29:315  315  HOMILIA  VIII.  316  bonis  vacui  ea  in  ipso  reperiamus,  quae  communicet  nobis:  quoniam  ipsi  visum  est  nos  ad  se  vocare,  ut  virtus  ipsius  in  nos  tanquam  a  capite  in  membra  defluat.  Ex  supradictis  igitur  satis  conspicuum  est,  in  verbis  illis  Annae,  Iehovam  fines  terrae  iudicaturum,  prophetiam  contineri.  Nam  qua  ratione  Deus  in  suam  potestatem  terram  reduxit,  nisi  in  persona  Domini  nostri  Iesu  Christi?  sicuti  loquuntur  Isaias  2  cap.  et  Micheas  4.  Deum  in  adventu  filii  sui  revocaturum  et  reducturum  ad  se  qui  ex  Iuda  dispersi  fuerint,  et  ex  cunctis  terrae  nationibus,  ac  fore  ut  quisque  proximum  manu  apprehensum  his  vocibus  cohortetur:  Eamus  in  Israelem  ut  ab  ipso  Deo  doceamur.  Denique  sic  terram  iudicaturus  Dominus  dicitur,  ut  hostes  suos  conterat,  ac  oris  sui  sceptro  confundat.  Tum  vero  maxime  Deus  populos  reduxit  et  suos  Satanae  tyrannidi  eripuit,  qua  premebantur,  quum  Christus  assumta  carne  nostra  in  mundum  venit.  Neque  vero  diffiteor  quin  sua  providentia  prius  cuncta  regeret  atque  administraret,  ita  testante  Daniele,  cuncta  esse  in  manu  ipsius:  verum  tamen  haec  de  qua  loquimur  dominatio  erat  hominibus  incognita.  Quo  vero  tempore  Dominus  noster  Iesus  Christus  venit  in  mundum  in  nomine  et  virtute  sui  patris  dominaturus,  tunc  prophetarum  vaticinia  sunt  impleta,  ac  nominatim  quod  ait  Isaias,  insulas,  maria  et  terras  gaudio  exsultaturas  :  quod  Deus  tum  sit  iudicaturus,  id  est,  orbem  universum  gubernaturus.  En  qualis  Annae  spes,  non  modo  in  Christum  Dominum  nostrum  venturum  sperans,  sed  etiam  eum  agnoscens  non  amplius  gente  iudaica,  ut  legis  tempore,  concludendum,  sed,  longe  lateque  in  orbe  universo  regnaturum  :  atque  adeo  tunc  miseros  ethnicos  ab  ipso  prorsus  alienos  atque  reiectaneos,  populo  ipsius  annectendos  et  in  eandem  haereditatem  admittendos,  diruta  nimirum  maceria  populum  utrumque  separante.  Nec  enim  poterat  aliter  ista  coniunctio  fieri.  Quare  vos  oro  mecum  ingens  Dei  beneficium  agnoscite,  quum  evangelii  praedicationem  ad  nos  usque  penetrare,  ac  proinde  rex  noster  esse  vult,  quo  beneficio  nullum  maius  accidere  potest.  Contra  si  evangelii  praedicatione  destituamur,  quid  aliud  superest  quam  ut  illius  tyrannidi,  qui  mundi  princeps  est,  nempe  diabolo  subiiciamur?  Vah,  quae  et  quam  horrenda  conditio!  Quis  non  merito  lugeat  ac  deploret  eiusmodi  hominum  statum,  si  Deo  per  verbum  suum  in  nobis  non  regnante,  diaboli  tyrannidi  parere  cogimur?  At  vero  contra  quantum  est,  quantique  faciendum  beneficium,  quantus,  inquam,  thesaurus,  evangelii  praedicatio,  qua  Deus  se  regem  nostrum  profitetur,  nosque  in  populum  suum  adsciscit,  quem  sine  fine  rogat,  foveat  et  tueatur?  Quamobrem  danda  nobis  opera  ne  adversus  ipsius  verbum  recalcitremus,  et  ingrati  tantum  beneficium