55:314  dum.  Nam  quae  pueri  discunt  rudimenta,  postea  locum  cedunt  altiori  et  solidiori  doctrinae.  Contra  Iohannes  negat  eiusmodi  esse  doctrinam  de  fratribus  diligendis,  quae  tempore  obsolescat:  sed  perpetuo  vigere,  ut  non  minus  sit  ultima  perfectio,  quam  tyrocinium.  Porro  hoc  necesse  fuit  addi:  quia,  ut  curiosi  plus  iusto  sunt  homines,  bona  pars  semper  novi  aliquid  cupide  appetit.  Hinc  simplicis  doctrinae  fastidium,  quod  innumera  errorum  portenta  gignit:  dum  quisque  novis  subinde  arcanis  inhiat.  Ubi  autem  hoc  constitutum  est,  Dominum  in  eodem  pergere  tenore,  ut  in  eo  quod  didicimus,  tota  vita  nos  retineat:  iniectum  est  huiusmodi  cupiditatibus  fraenum.  Ergo  qui  ad  sapientiae  metam  pertingere  cupit,  quod  ad  vitam  recte  instituendam  attinet,  ille  in  caritate  proficiat.  Quae  est  veritas.  Probat  ratione  quod  dixit:  quia  hoc  uno  caritatis  mandato,  quod  ad  institutionem  vitae  spectat,  constat  tota  Christi  veritas.  Quae  porro  exspectanda  est  alia  maior  revelatio?  Nam  Christus  certe  omnium  finis  est  ac  complementum:  proinde  veritatis  nomen  huc  spectat,  ut  subsistant  quasi  in  meta.  Nam  pro  complemento  vel  absoluto  statu  accipitur.  Christum  illis  coniungit,  ut  membris  caput  :  ac  si  diceret,  corpus  ecclesiae  non  aliam  habere  perfectionem:  vel  tunc  solide  Christo  unitos  fore,  si  sanctus  amor  inter  ipsos  mutuo  vigeat.  Alii  secus  exponunt,  Quod  est  veritas  in  Christo,  etiam  in  vobis  est,  sed  non  video  quorsum  id  spectet.  Quia  tenebrae  transeunt  Praesens  tempus  loco  praeteriti.  Significat  enim,  simul  ac  Christus  illuxit,  nos  habere  plenum  intelligentiae  fulgorem.  Non  quod  sapiat  quisque  fidelium  primo  die  quantum  oportet  (nam  et  Paulus  se  eniti  testatur  ut  apprehendat  quod  nondum  assequutus  est  (Philip.  3,12),  sed  quia  Christi  notitia  ad  discutiendas  tenebras  sola  sufficit.  Ergo  necessarii  sunt  quotidiani  progressus:  et  prius  suam  auroram  habet  cuiusque  fides,  quam  ad  meridiem  perveniat.  Sed  quia  eiusdem  doctrinae  tenorem  continuat  Deus,  in  qua  proficere  nos  iubet:  merito  evangelii  cognitio  verum  lumen  dicitur,  ubi  Christus  sol  iustitiae  affulget.  Ita  via  praecluditur  hominum  audaciae,  qui  evangelii  puritatem  corrumpere  suis  figmentis  tentant:  ac  tuto  universam  papae  theologiam  anathemate  damnare  licet,  quae  hoc  verum  lumen  prorsus  obscurat.  9.  Qui  dicit  se  in  luce.  Prosequitur  suam  metaphoram.  Dixit  caritatem  unicam  esse  regulam  ad  quam  exigenda  sit  vita:  dixit  hanc  legem  nobis  in  evangelio  praescribi:  dixit  postremo  illic  esse  quasi  meridianam  lucem,  quae  oculos  nostros  intuitu  sui  retinere  debet.  Nunc  ex  adverso  colligit,  caecutire  omnes  ac  in  tenebris  errare  qui  a  caritate  alieni  sunt.  Quod  autem  prius  amorem  Dei  posuit,  nunc  fratrum,  nihilo  plus  est  repugnantiae  quam  inter