50:314  reste,  il  sera  reserve  a  dimanche  prochain,  au  plaisir  de  Dieu.  Or  nous  nous  prosternerons  devant  la  maieste  de  nostre  bon  Dieu,  en  cognoissance  de  nos  fautes,  le  prians  qu'il  nous  les  face  sentir  de  plus  en  plus,  et  que  ce  soit  pour  nous  attirer  a  une  droite  repentance,  et  pour  nous  faire  croistre  et  profiter  en  la  foy,  a  fin  que  nous  luy  soyons  vrais  sacrifices:  et  comme  nostre  Seigneur  Iesus  s'est  offert  pour  nostre  redemption,  qu'aussi  nous  advisions  de  nous  dedier  pleinement  a  luy  :  et  que  nous  soyons  conduits  par  luy  en  telle  perseverance,  qu'en  la  vie  et  en  la  mort  nous  ne  cerchions  autre  contentement  et  repos,  sinon  d'acquiescer  a  sa  bonne  volonte,  et  que  nous  n'ayons  autre  chose  pour  nous  glorifier,  sinon  au  salut  qui  nous  a  este  acquis  en  luy.  Que  non  seulement  il  nous  face  ceste  grace,  mais  aussi  a  tous  peuples  et  nations  de  la  terre  etc.  QUATRIEME  SERMON.  GALATES.  Chap.  I  v.  8.9.  Nous  avons  veu  par  ci-devant  comme  nous  devons  estre  asseurez  en  la  verite  de  l'Evangile,  ou  il  n'y  a  nulle  foy  en  nous:  c'est  plustost  une  opinion,  quand  nous  serons  prests  a  chanceler  ca  et  la.  Voila  donc  l'approbation  que  nous  devons  avoir  de  nostre  foy,  c'est  que  nous  soyons  arrestez  et  resolus  que  Dieu  nous  a  enseignez,  et  qu'il  nous  a  tellement  declare  sa  volonte  que  si  nous  en  declinons  d'un  coste  ou  d'autre,  c'est  comme  nous  ietter  a  perdition  a  nostre  escient.  Et  pour  ceste  cause  non  seulement  nous  devons  recevoir  la  parole  de  Dieu  comme  bonne  et  saincte,  mais  nous  luy  devons  porter  cest  honneur,  d'avoir  en  detestation  tout  ce  qui  y  est  contraire,  et  qui  ne  s'y  accorde  point  mesmes.  Car  quand  sainct  Paul  parle  ici  d'un  autre  Evangile,  il  entend  que  si  on  desguise  la  pure  simplicite  qu'on  avoit  apprise  de  luy,  il  n'y  a  plus  que  mensonge  et  corruption.  Apprenons  donc  de  tellement  magnifier  la  doctrine  de  Dieu,  que  non  seulement  nous  la  prisions  en  soy,  mais  que  nous  reiettions  comme  chose  diabolique  tout  ce  qu'on  pourra  amener  a  l'opposite,  et  qui  sera  repugnant.  Et  mesmes  sainct  Paul  ne  se  contente  point  de  parler  des  hommes,  mais  il  va  iusques  aux  Anges  de  Paradis,  et  dit  que  nous  les  devons  plustost  tenir  execrables,  que  de  changer  rien  en  la  foy  que  nous  avons  de  l'Evangile.  Il  parle  bien  de  soy  en  premier  lieu,  et  c'est  pour  monstrer  qu'il  n'a  point  esgard  a  sa  personne,  mais  qu'il  veut  simplement  honorer  Dieu,  et  faire  que  sa  parole  soit  receue  de  tout  le  monde  sans  contredit.  Il  faloit  bien  donc  que  sainct  Paul  usast  de  ceste  protestation  la,  car  si  quelqu'un  vouloit  exempter  sa  doctrine  par  quelque  privilege,  cestuy-la  meneroit  une  querele  privee,  Mais  celuy  qui  enseigne  se  doit  mettre  au  reng  commun  et  s'assubietir  a  l'obeissance  de  l'Evangile  de  nostre  Seigneur  Iesus  Christ:  que  nous  n'ayons  point  maistre  en  ce  monde  duquel  nous  tenions  nostre  foy:  mais  que  le  Fils  de  Dieu  ait  toute  maistrise  sur  nous,  comme  elle  luy  appartient.  Or  notamment  S.  Paul  parle  des  Anges,  pour  ce  que  les  faux-apostres  et  seducteurs  qui  estoyent  venus  au  pays  de  Galatie  pretendoyent  le  nom  de  Pierre,  et  de  Iean  et  de  Iaques:  il  les  rembarre  et  dit,  Quand  ils  auront  tout  de  leur  coste,  mesmes  que  tout  le  monde  sera  de  leur  part,  tout  cela  n'est  rien.  Apres,  s'ils  avoyent  mesmes  les  Anges  de  Paradis,  si  faut-il  neantmoins  que  Dieu  domine  en  sa  Parole  et  que  toutes  creatures  soyent  mises  bas:  car  s'il  y  a  rien  qui  s'esleve  contre  la  verite  de  noitre  Dieu,  la  ou  son  image  reluit,  et  ou  sa  maieste  et  gloire  doit  estre  cognue,  cela  doit  aussi  estre  condamne  et  tenu  comme  execrable.  Il  sembleroit  bien  de  prime  face  que  sainct  Paul  usast  d'une  facon  excessive.  Car  a  quel  propos  ameneil  les  Anges,  veu  que  nous  scavons  que  du  tout  ils  sont  adonnez  a  faire  la  volonte  de  Dieu?  comme