47:314  simpliciter  dicta  statim  credi  posset.  Turbatum  spiritu  Christum  dicit,  ut  sciamus  non  vultu  modo  et  verbis  speciem  turbati  hominis  dedisse,  sed  penitus  ita  fuisse  in  animo  suo  affectum  :  et  spiritus  pro  mente  capitur  vel  anima.  Neque  enim  quorundam  opinioni  subscribo,  qui  Christum  exponunt  quasi  violento  spiritus  motu  fuisse  impulsum,  ut  in  haec  verba  prorumperet.  Fateor  quidem,  spiritum  omnes  Christi  affectus  fuisse  moderatum,  sed  alia  est  mens  evangelistae,  quod  interior  nec  simulata  fuerit  haec  Christi  passio.  Idque  nostra  scire  magni  interest,  quia  ipsius  zelus  nobis  ad  imitationem  proponitur,  ut  serio  exhorreamus  monstra  ista,  quae  sacrum  Dei  et  ecclesiae  ordinem  evertunt.  22.  Adspiciebant  itaque  se  mutuo.  Qui  sibi  non  male  conscii  sunt,  anxii  redduntur  Christi  dicto:  unus  Iudas  sic  obstupuit  in  sua  malitia,  ut  non  tangatur.  Tanti  apud  discipulos  erat  Christi  autoritas,  ut  certo  persuasi  essent  nihil  temere  ab  ipso  dici.  Satan  vero  ex  corde  Iudae  omnem  reverentiam  excusserat,  ut  ad  repellendas  omnes  admonitiones  saxea  rupe  esset  durior.  Tametsi  autem  parum  humaniter  videtur  facere  Christus,  qui  innoxios  ad  tempus  torquet,  quia  tamen  illis  profuit  eiusmodi  anxietas,  nihil  illis  iniuriae  fecit  Christus.  Expedit  enim  ut  audito  impiorum  iudicio  filii  Dei  torqueantur  etiam  ipsi,  quo  so  ipsos  excutiant  caveantque  hypocrisin:  inde  enim  illis  datur  occasio  se  et  suam  vitam  examinandi.  Docet  autem  hic  locus,  sic  interdum  taxandos  esse  impios,  ut  non  statim  ostendantur  digito,  donec  eos  manu  sua  Deus  traxerit  in  lucem.  Occulti  enim  saepe  sunt  in  ecclesia  morbi,  quos  dissimulare  non  licet.  Interim  nondum  ita  matura  est  hominum  ipsorum  nequitia,  ut  detegi  possit.  Tunc  igitur  haec  tenenda  est  media  ratio.  23.  Quem  Iesus  diligebat.  Peculiaris  amor,  quo  Christus  Ioannem  complexus  est,  clare  testatur  non  pugnare  semper  cum  caritate,  si  quos  aliis  magis  amamus:  sed  totum  in  eo  positum  est,  ut  amor  noster  Deum  respiciat,  et  quo  quisque  Dei  donis  magis  excellit  in  eum  feratur.  Ab  eo  scopo  nunquam  vel  minimum  Christus  deflexit.  Nos  vero  longe  aliter:  nam  quae  est  ingenii  nostri  vanitas,  pauci  sunt  qui  homines  amando  propius  ad  Deum  accedant.  Atqui  nunquam  recte  composita  erit  hominum  inter  se  dilectio,  nisi  quae  ad  Deum  referetur.  Quod  narrat  Ioannes  se  discubuisse  in  sinu  Christi,  posset  hodie  id  videri  parum  decorum:  sed  talis  erat  tunc  discumbendi  ratio.  Neque  enim  sedebant  ut  nos  ad  mensam,  sed  calceis  exuti  et  pulvinis  innixi  in  lectulis  semisupini  iacebant.  26.  Cui  ego  intinctam  buccellam.  Si  quis  quaerat,  quorsum  attinuerit  porrecta  offula  notari  proditorem,  quum  posset  Christus  palam  eum  nomine  designare,  si  notum  esse  vellet,  respondeo,  tale  fuisse  hoc  in-