6:312  nomen,  iam  visum  est.  Hoc  si  clarius  exponi  tibi  velis,  sic  habe:  instar  materiae  esse  in  homine  voluntatem,  quae  gratiae  operationi  subiecta  sit,  ut  ab  ea  formam  accipiat.  Ita  voluntatem,  cum  spontaneo  motu,  sequitur  a  natura  esse,  malitiam  ex  naturae  corruptione  manasse,  bonitatem  a  gratia  spiritus  sancti  proficisci,  itaque  proprium  esse  eius  opus.  Quae  sequuntur  apud  Pighium,  tumultuosae  sunt  phrenetici  hominis  voces.  Quoniam  negat  Augustinus,  ea  se  damnare  liberi  arbitrii  opera,  quae  ut  fiant,  praeparantur  per  gratiae  praeventum,  nullo  liberi  arbitrii  merito,  eaque  faciente,  gubernante,  perficiente  fiunt,  insultat  hic  quasi  victor,  et  meam,  tum  stultitiam,  tum  pervicaciam  increpat,  quod  nihil  discernam.  Egone  hunc  phreneticum  non  dicam,  qui  recta  iugulum  suum  petit,  dum  hostem  ferire  se  putat?  Liberi  arbitrii  nomen,  de  quo  supervacua  altercatio  esset,  omittamus.  Ea  demum  bona  opera  et  laude  digna  pronunciat  Augustinus,  quae  Dei  spiritu,  ut  fiant,  praeparantur,  idque  fieri  gratiae  praeventu,  nullo  voluntatis  merito.  Si  Dei  gratia  praevenitur  nostra  voluntas,  nullo  suo  merito,  ubi  bonus  motus  et  praeparatio,  quam  Pighius  comminiscitur?  Si  facit,  gubernat,  perficit  eadem  gratia  in  nobis,  [pag.  l  l  l  ]  quidquid  est  bonorum  operum,  quid  adhuc  litigamus?  Intonat  Pighius  clamosa  voce,  ut  hoc  audiam.  Ego  vero  libenter  et  audio,  et  profiteor.  At  liberi  arbitrii  esse  bona  opera  asserit  Augustinus:  quod  negamus.  Egone  voluntaria  esse  bona  opera  unquam  negavi?  At  nullas  libero  arbitrio  partes  in  bonis  operibus  tribuo.  Nullas  sane,  nisi  ut  agat,  dum  agitur,  quia  per  se  nihil  potest:  quod  si  Augustini  verbis  non  est  consentaneum,  neque  ovum  ovo  simile  est.  At  Augustinus  sanctos  bonis  operibus  censet  :  ego  opera,  qualiacunque  sint,  adeo  ad  consequendam  iustitiam  valere  nego,  ut  impia  sint,  si  hunc  habeant  respectum.  Respondeo,  huic  disceptationi  non  esse  nunc  locum:  unde  homines  iustitiam,  coram  Deo,  consequantur.  Quod  autem  ad  praesentem  quaestionem  attinet,  prorsus  nobiscum  illud  sancti  viri  verbum  facit.  Nam  quoties  gratuitam  esse  hominis  iustitiam  probare  vult,  hanc  rationem  subinde  in  ore  habet:  nos  Dei  iustitiae  obedire,  non  per  liberum  arbitrium,  quod  natum  est  in  nobis,  sed  per  spiritum  sanctum,  qui  datus  est  nobis.  Iam  ad  tertium  ordinem  operum  Augustini  nos  vocat  Pighius  :  quo  tamen  antequam  veniat,  paeanas  sibi  canit,  quasi  iam  parto  triumpho;  nec  alia  de  causa  certare  se  adhuc  fatetur,  nisi  ut  promisso  satisfaciat.  Sic  forte  sibi  persuaserat,  quum  solus  sua,  sine  alterius  censura  et  animadversione,  legeret.  Nunc  ubi  nostra  legerit,  agnoscet,  ut  spero,  se  plausum  nimis  ineptum  ac  praecipitem  sibi  dedisse.  Allegat  ex  secundo  ad  Marcellinum  libro