52:312  damnatione  eas  terreat  Paulus:  ac  si  hoc  ipsum  reprehenderet,  eximium  illum  ordinem,  qui  propius  Christo  unire  debuerat,  illis  damnationis  esse  materiam.  Et  ratio  additur,  quia  a  fide  baptismi  et  christianismo  prorsus  deficiant.  Scio  ab  aliis  secus  intelligi,  nempe  quod  fallant  datam  ecclesiae  fidem  nubendo,  quum  prius  essent  pollicitae  se  ad  mortem  usque  coelibes  victuras:  quod  nimis  et  frigidum.  Deinde  cur  vocaret  primam  fidem?  Vehementius  itaque  insurgit  Paulus,  et  mali  gravitatem  amplificat,  quod  non  tantum  ignominia  Christum  et  ecclesiam  afficerent  resiliendo  a  suscepta  conditione,  sed  primam  quoque  fidem  impia  defectione  fallerent.  Ita  enim  fieri  solet  ut  qui  semel  pudoris  fines  transsiliit,  ad  omnem  impudentiam  se  prostituat.  Male  eas  habebat,  probrosam  esse  suam  levitatem  apud  pios,  et  suam  salacitatem  reprimi,  aut  saltem  vituperationi  esse  obnoxiam.  Haec  illis  protervius  exsultandi  erat  occasio,  donec  christianismum  abiicerent.  Optime  quadrat  ista  amplificatio.  Quid  enim  magis  absurdum  quam,  dum  volumus  personis  consulere,  ianuam  aperire  Christi  abnegationi?  Quod  votum  perpetui  coelibatus  hinc  stabilire  volunt  papistae,  frivolum  est.  Ut  demus  solitam  fuisse  disertis  verbis  interponi  talem  pactionem  :  id  tamen  nihil  ad  ipsos.  Primum  considerandus  est  finis.  Non  ideo  coelibes  se  fore  promittebant  olim  viduae  ut  sanctiorem  agerent  vitam  quam  in  coniugio:  sed  quod  non  poterant  maritis  et  ecclesiae  simul  esse  addictae.  Sub  papatu  autem  vovetur  continentia,  quasi  virtus  per  se  accepta  esset  Deo.  Deinde  ea  aetate  se  abdicabant  tunc  nubendi  libertate,  qua  desierant  esse  nubiles.  Sexagenarias  enim  ad  minimum  esse  oportebat:  et  quae  unico  matrimonio  contentae  specimen  iam  castitatis  suae  dedissent��  Nunc  autem  vota  in  hoc  eduntur  apud  papistas,  ut  coniugiis  vel  ante  tempus,  vel  in  medio  aetatis  fervore  renuntient.  Duabus  autem  maxime  de  causis  tyrannicam  de  coelibatu  legem  improbamus:  quod  scilicet  cultum  esse  fingunt  coram  Deo  meritorium,  et  quod  vovendi  temeritate  praecipitant  animas  in  exitium.  Neutrum  erat  in  vetere  instituto.  Non  edebant  directum  continentiae  votum,  quasi  minus  Deo  placeret  vita  coniugalis:  sed  tantum  quatenus  exigebat  functio  ad  quam  eligebantur,  coniugii  vinculo  se  in  totam  vitam  solvebant.  Nec  se  privabant  nubendi  libertate,  nisi  quum  nubere  vel  maxime  liberis  iam  absurdum  erat  et  intempestivum.  Denique  tantum  a  monialibus  differebant  istae  viduae,  quantum  Hanna  prophetissa  a  Claudia  vestali.  13.  Simul  et  otiosae.  Nihil  est  quod  mulieres  magis  deceat  quam  domus  custodia.  Unde  apud  veteres  teetudo  honestae  et  probae  matrisfamilias  imago  fuit:  atqui  multae  contrario  morbo  laborant.  Nihil  enim  est  quod  magis  eas  delectet  quam  huc