29:312  poenas  reportaturos.  Nos  vero  Deo,  si  in  aliquam  dignitatem  evexerit,  hanc  gloriam  tribuamus,  ut  illius  unius  virtute  subsistere  nos  agnoscamus,  ac  sine  illa  brevi  deiiciendos  et  in  nihilum  redigendos:  ideoque  modestiam  colamus,  minime  dubitantes  quin  vires  ipse  sufficiat,  modo  ad  eius  cultum  et  gloriam  omnia  nostra  referamus:  atque  ipse  nos,  mundus  licet  sus  deque  feratur,  sartos  tectos  tueatur.  Idcirco  sequentia  quoque  nobis  expendenda,  quibus  dicitur  Deus  inimicos  conditurus,  terraeque  fines  iudicaturus,  quibus  superiora  magis  confirmantur.  Nam  obiecisset  aliquis,  improbos  a  Deo  in  tantam  dignitatem  evectos,  non  ignorante  quid  illis  futurum  esset,  stare  autem  ipsos  et  in  eodem  statu  permanere.  Quare  ut  omnem  ipsorum  splendorem  et  gloriam  in  fumos  abituram,  ac  triumphos  perituros,  atque  pro  dignitate  et  honoribus  dedecus  et  ignominiam  reportaturos  sciamus,  Deus  hostes  suos  contrituru8  terraeque  fines  iudicaturus  praedicatur:  quibus  verbis  Deus  esse  Deus  asseritur,  et  impiorum  exitium  praedicitur.  Digna  sane  observatione  repetitio,  ut  Deum  mundi  iudicem  esse  sciamus  ad  impios  iudicandos.  Ac  si,  ut  supra  dictum  est,  non  repente  ad  iudicium  prosilit,  sed  lento  gradu  progreditur,  ita  explorari  et  exerceri  nostram  patientiam  teneamus,  ut  patienter  illum  exspectare  discamus.  Quotiescunque  igitur  Deum  appellari  iudicem  mundi  audimus,  memoria  recolamus,  ipsum  improbos  contriturum,  ac  desuper  maiestatis  suae  signa  daturum  ad  improbos  numinis  sui  contemptores  perdendos  et  fulmine  suo  feriendos.  Hinc  discamus  improborum  rebus  secundis  et  triumphis  non  invidere,  et  licet  omnia  ipsis  ex  animi  sententia  succedant,  tamen  iudiciorum  Dei  exitum  patienter  praestolemur.  Interea  vero  cavendum  nobis  summopere  ne  tremendam  horrendamque  Dei  manum  adversum  nos  provocemus:  cuius  vel  ipsa  tonitrua  ac  tempestates  signa  certissima  sunt.  Atque  enim  vicissim  cavendum  ne  illis  terreamur,  sed  divinae  maiestatis  esse  signa  sciamus,  ut  eius  praesentia  freti  uno  illo  nitamur,  atque  diabolum  omnesque  inimicos  despiciamus  atque  ultro  provocemus,  Vires  nobis  Deum  suffecturum  scientes,  quibus  omnes  ipsorum  conatus  superemus.  Deinceps  vero  Deus  dicitur  fines  terrae  iudicaturus,  et  fortitudinem  regi  suo  daturus,  et  cornu  uncti  sui  daturus.  Quae  si  pro  temporis  illius  ratione  considerentur,  scrupulum  aliquem  afferre  poterunt;  sed  ex  prophetae  sensu  simpliciter  exposita  nullam  in  se  difficultatem  habebunt.  Nam  etsi  peculiarem  sibi  tunc  populum  Deus  elegerat,  quem  imperio  suo  regeret,  non  tamen  omnem  reliqui  mundi  curam  abiecisse  putandus  est.  Itaque  haec  duo  inter  se  cohaerent,  Iehovam  fines  terrae  iudicaturum  et  regi  suo  fortitudinem  daturum,  atque  uncti  sui  cornu  exaltaturum.  Nullus  porro  tunc  in  Israele