52:310  explicatius  quam  antea.  Ac  primo  aetatem  designat,  sexaginta  annos:  nam  quia  publicis  sumptibus  alebantur,  decebat  iam  senio  confectas  esse.  Deinde  erat  altera  etiamnum  validior  ratio:  nam  se  in  ministerium  ecclesiae  consecrabant.  Quod  minimo  ferendum  erat,  si  adhuc  ad  coniugium  idoneae  fuissent.  Ea  conditione  recipiebantur  ut  earum  inopiae  subveniret  ecclesia,  et  suam  interim  operam  pauperibus  impenderent,  quoad  patiebatur  valetudo.  Ita  mutua  erat  obligatio  inter  ipsas  et  ecclesiam.  Robustiores,  et  quae  per  aetatem  adhuc  erant  vegetae,  iniquum  erat  aliis  esse  oneri.  Praeterea  timendum  erat  ne  mutato  animi  proposito  ad  novas  nuptias  adspirarent.  Hae  sunt  duae  causae  cur  non  velit  nisi  sexagenarias  recipi.  Quoad  nubendi  cupiditatem,  satis  occursum  est  periculo,  ubi  annum  sexagesimum  excessit  mulier:  si  praesertim  unum  duntaxat  maritum  tota  vita  experta  fuerit.  Est  enim  quoddam  veluti  pignus  continentiae  et  pudoris,  quum  mulier  ad  eam  uaque  aetatem  pervenit  unico  marito  contenta.  Non  quod  secundum  coniugium  improbet:  aut  ignominiae  notam  adspergat  bisnuptis:  quin  potius  iuniores  viduas  ad  nubendum  hortatur:  sed  quia  sollicite  cavere  voluit  ne  ullis  necessitatem  imponeret  coelibatus,  quae  maritis  opus  haberent.  Qua  de  re  mox  plura.  10.  In  operibus  bonis.  Quae  sequuntur  dotes,  partim  ad  honorem,  partim  ad  onus  respiciunt.  Non  dubium  est  quin  fuerint  honesta  viduarum  collegia,  plenaque  dignationis.  Ideo  non  vult  Paulus  illuc  cooptari  nisi  quae  ornatae  sint  egregio  testimonio  totius  anteactae  vitae.  Iam  non  ad  segne  et  ignavum  otium  destinabantur:  sed  ut  pauperibus  et  aegrotis  ministrarent,  donec  viribus  deiectae  tanquam  emeritae  quiescerent.  Itaque  ut  ad  obeundam  functionem  sint  aptiores,  in  officiis  omnibus,  quae  sunt  illius  propria,  longo  usu  exercitatas  esse  vult:  qualia  sunt  labor  et  sedulitas  in  liberis  educandis,  hospitalitas,  ministeria  erga  pauperes,  et  reliqua  beneficentiae  opera.  Si  quis  hic  interroget,  Ergone  repudiabuntur  omnes  steriles,  quia  nullos  unquam  liberos  sustulerint?  respondendum,  non  sterilitatem  hic  damnari  a  Paulo,  sed  matrum  delitias,  quae  sobolis  alendae  taedia  devorare  dum  recusant,  satis  ostendunt  se  minus  officiosas  fore  erga  extraneos.  Et  simul  hanc  piis  matronis  honorariam  mercedem  proponit,  quae  sibi  non  pepercerint:  ut  vicissim  aetas  earum  senilis  ecclesiae  gremio  fovenda  excipiatur.  Per  lotionem  pedum  synecdochicas  obsequia  intelligit  quae  sanctis  praestari  solent.  Moris  enim  tunc  erat  pedes  lavare.  Hoc  officii  genus  in  speciem  sordidum  et  prope  servile  videri  poterat:  itaque  hac  quasi  nota  insignit  sedulas  et  minime  delicatas  aut  molles  foeminas.  Quod  proxime  sequitur,  ad  liberalitatem  pertinet.  Atque  idem  postremo  generalius  exprimit,  quum  dicit,  si  20*