29:310  mus.  Porro  fideles  hic  vocantur  benigni,  ex  scripturae  phrasi  usitatissima,  quod  quibusvis  tentationibus  resistere,  Deumque  hac  in  parte  imitari  cupiant,  Christi  Domini  nostri  praeceptum  sequentes,  iubentis  apud  Lucam  fideles  esse  misericordes  et  perfectos,  ut  pater  ipsorum  qui  in  coelis  est  misericors  est:  quod  clementia  et  misericordia  Deo  sit,  quemadmodum  ethnici  ipsi  cognoverunt,  convenientissima.  Et  Paulus  ad  Ephes.  5,  1  iubet  nos  Deum  imitari,  ut  nimirum  versemur  cum  caritate  cum  propinquis,  et  fraterno  vinculo,  ac  mutuis  beneficiis  vinciamur.  Quare  si  revera  quales  cupimus  haberi  filii  Dei  esse  volumus,  clementiae  ac  misericordiae  studendum  est:  ac  belluina  natura,  qua  modo  hic  modo  ille  arroditur,  exuenda:  miserorum  et  infirmorum  habenda  ratio,  mores  aliorum  modestia  tolerandi,  eorum  quibuscum  vivimus  commodis  certatim  studendum:  denique  tanta  humanitatis  habenda  ratio,  ut  nemo  do  nostra  feritate  et  immanitate  merito  conqueratur,  ac  nihil  impediat  quominus  placide  cum  iis  quibuscum  nos  Deus  sociavit  vitam  transigamus.  Atque  huius  vocis  benignorum  vel  misericordium,  saepe  in  sacris  occurrentis  haec  esto  ratio.  Contra  dicitur  fore  ut  improbi  in  tenebris  conticescant,  id  est  confundantur  et  os  illis  occludatur:  hic  enim  sensus  est  horum  verborum,  in  tenebris  conticescant.  Atque  de  improbis  haec  nominatim  dicuntur,  quod  ad  Dei  nomen  blasphemis  vocibus  laedendum  apertum  os  habeant,  et  sit  ipsis  iocus  adversus  Deum  insurgere,  et  eius  verbo  flagitiose  illudere.  At  quae  hominum  insania!  immo  vero  quis  furor  diabolicus?  Neque  enim  audaciam  tantum  nominandam  illam  adversus  Deum  viventem  insultandi  licentiam  iudico.  Siccine  vero  miseros  homunciones,  immo  vero  lumbricos  erepentes  e  terra,  et  putria  cadavera  adversus  creatorem  insurgere,  de  solio  detrahere  atque  virtutes  eius  lacerare?  Atqui  ruentibus  caeteris  mortalibus  in  tam  effraenem  licentiam  nos  patienter  praestolemur  Dei  vindicis  manum,  fraenum  olim  impuro  istorum  ori  iniecturam.  Ita  ergo  dicitur  fore  ut  improbi  conticescant  in  tenebris,  et  omnis  iniquitas  contrahat  os  suum.  Neque  vero  improbi  momento  conticescunt,  quum  subinde  videas  ipsos  recalcitrantes  :  verumtamen  divinam  sapientiam  et  iustitiam  tandem  emergere  necesse  est,  ut  qui  adversus  Deum  obgannierint,  tandem  summo  cum  dedecore  in  aeternum  praecipites  dentur  exitium.  Idcirco  Psal.  51,  6  Deus  iustificari  dicitur  in  sermonibus,  licet  adversus  ipsum  hominibus  murmurantibus.  Nam  quae  est  hominum  amentia,  quod  ipsos  Dei  iudicia  ad  suam  trutinam  expendere,  et  eadem  nisi  placeant  reiicere,  seque  suis  rationibus  tueri  non  pudeat?  Atqui,  fateor,  ad  tempus  capita  coelo  inferunt  ac  furorem  suum  adversus  Deum  evomunt,  verum  enimvero  non  tam  diuturnus  ille  furor  est  quin  Dei  potentis  20*