31:31  31  32  ministrant,  qui  denique  pleno  ore  gloriantur  se  evangelii  esse  praecones:  eos  tam  nefaria  bella  moliri  quam  detestabile  est?  Hic  vero  cum  Davide  conqueri  optimo  iure  licet  :  Homo  pacis  meae,  et  qui  mecum  panem  edebat,  extulit  contra  me  calcaneum,  Psal.  41,  10.  Item,  Psal.  55,  14  :  Unanimis  meus,  et  collega  qui  mecum  ad  templum  Dei  pergebat,  cum  quo  dulce  communicabam  consilium,  me  hostiliter  probris  impetivit.  Alii  de  meis  thesauris,  alii  de  immensa  potentia  frivolos  rumores  spargunt:  ab  aliis  iactantur  meae  lautitiae,  scilicet  qui  tenui  victu  et  plebeio  vestitu  contentus,  nec  a  minimis  etiam  quibusque  plus  frugalitatis  requirit  quam  in  eo  spectatur,  is  nimium  lautus  habebitur?  Potentiae,  cui  invident,  utinam  ipsi  essent  successores  :  regnum  enim  meum  mole  qua  obruor  laborum  aestimant.  Me  non  esse  pecuniosum,  si  vivus  quibusdam  non  persuadeo,  mors  tandem  ostendet.  Me  quidem,  quia  nihil  plus  quam  suppetit  appeto,  minime  pauperem  esse  fateor.  His  figmentis  quum  nullus  sit  color,  plausum  tamen  apud  multos  ideo  obtinent,  quia  maior  pars  hoc  unum  tegendis  suis  flagitiis  remedium  esse  confidit,  si  albis  nigra  misceantur:  atque  hoc  optimum  impunitatis  et  licentiae  compendium  fore,  si  concidat  servorum  Christi  autoritas.  Accedunt  etiam  placentarii  scurrae,  de  quibus  conqueritur  David,  Psal.  35,  16.  nec  mensarum  liguritores  solum,  sed  quicunque  potentum  gratiam  falsis  delationibus  venantur.  Ad  has  iniurias  vorandas  pridem  assuetus  quamvis  prope  occalluerim,  fieri  tamen  non  potest,  ubi  crescit  protervia,  quin  amaris  interdum  punctionibus  feriar.  Nec  satis  erat  a  vicinis  ita  inhumaniter  tractari,  nisi  a  mari  etiam  glaciali  nescio  quae  intemperiis  hominum