30:31  31  HOMILIA  XLVII.  32  conversus  ab  illo  suppetias  peteret:  vel  si  forte  ingenti  metu  et  horrore  perculsus  ad  Deum  confugere  non  recordaretur,  parta  saltem  victoria  et  debellatis  hostibus,  Deo  soli  gloriam  tribuere  meminisset  totius  victoriae,  ne  quam  sibi  homines  partem  laudis  vendicarent.  Neque  enim  frustra  dixit  propheta,  Deum  non  delectari  equi  fortitudine  quod  etiam  hominibus  merito  possumus  applicare.  Minime  id  quidem  quasi  Deus  opus  suum  oderit.  Nam  si  fortis  equus  et  robustus  nobis  contigerit,  sane  possumus  eo  ad  res  necessarias  uti:  et  si  viribus  praediti  sunt  homines,  Dei  donum  esse  certum  est,  minime  contemnendum.  Sed  quoniam  proclives  sumus  ad  ambitionem  et  arrogantiam  mediis  istiusmodi  exornati,  ut  nobis  videamur  satis  ex  nobis  ipsis  validi  ad  nos  tutandos:  idcirco  dicitur  Deus  illis  mediis  non  delectari:  ne  in  illis  fiduciam  nostram  collocemus  et  acquiescamus:  sed  ut  ad  Deum  confugientes  ab  illo  solo  salutem  speremus,  et  in  omni  humilitate  illum  invocantes  debitum  honorem  reddamus.  Porro  Deum  ardentibus  et  sinceris  precibus  interpellare  non  possumus,  nisi  in  angustias  redacti  fuerimus  et  inopiam  nostram  senserimus.  Nam  si  rebus  omnibus  necessariis  instructi  nobis  videamur,  et  voti  facti  compotes  omnia  ex  animi  sententia  succedant,  Deum  licet  precemur,  non  serio  affectu  facimus,  sed  tantum  ex  more  et  ritu  quodam  externo.  Quapropter  necesse  est  nos  rebus  omnibus  destitui,  eo  usque  ut  inopia  nos  ad  Deum  deducat,  tanta  quidem  animi  vehementia,  ut  ipsi  debitum  honorem  reddamus:  et  non  tantum  ore  sed  re  ipsa  et  ex  animo  profiteamur  salutem  nostram  ab  illo  solo  pendere,  sine  cuius  favore  et  benevolentia  nostra  salus  periclitetur,  et  de  nobis  sic  actum  sit,  ut  nulla  salus  superesse  videatur.  Quamobrem  minime  dubium  est  quin  Deus  voluerit  populum  suum  inermem  esse,  et  rebus  omnibus  ad  iustam  defensionem  vacuum,  ut  deinceps  victoria  de  hostibus  insigne  esset  trophaeum  et  monumentum  oblati  a  Deo  e  coelis  auxilii,  et  erepti  populi  sola  Dei  virtute  et  potentia  e  mortis  faucibus,  quod  spem  omnem  salutis  abiecisset.  Caeterum  observemus  quanta  in  isto  populo  rerum  omnium  esset  confusio,  quum  Dei  hostes  tantam  in  populum  tyrannidem  exercerent,  ut  miseris  hominibus  ne  liceret  quidem  ad  conficiendos  vomeres  aut  ligones  suos,  aut  secures  suas,  aut  rutra,  denique  necessaria  omnia  instrumenta  ad  terram  colendam,  aut  alia  ad  domesticos  usus  instrumenta  fabros  habere,  adeo  ut  ligna  scindere  nisi  commodato  acceptis  securibus  non  possent:  et  necessario  a  suis  hostibus  accipere  cogerentur,  a  quibus  tamen  centies  millies  caesi  periissent  si  Deus  permisisset.  Quum  igitur  in  tantas  angustias  redactum  videmus  populum  illum  a  Deo  electum,  et  solum  in  toto  terrarum  orbe  in  quo  Dei  nomen  invocabatur  et  adora-