5:309  DE  SACERDOTIO  PAPALI  ABIICIENDO.  e  manibus  amittas:  quando  ea  est  rerum  agendarum  penes  te  facultas,  quae  si  tota  in  Dei  obsequia  optima  fide  impendatur,  multum  momenti  ad  promovendum  evangelium  afferre  possit.  Et  nostrarum  est  partium,  non  ignavia  torporeque  nostro  admittere,  ut  hoc  genus  opportunitates,  e  Dei  manu  nobis  oblatae,  infructuosae  pereant.  Sed  enim  si  praestando  veri  fidique  pastoris  officio  nullo  modo  idoneum  te  vides,  hoc  secundum  est,  male  tibi  assignatum  munus  ut  deponas  potius,  quam  indigne  ac  perfidiose  administres.  Cedendo  enim,  episcopum  te  non  esse  saltem  declarabis:  cuius  personam  nunc  sustines,  et  functionem  profiteris.  Equidem  si  aut  ecclesiae  christianum  in  morem  utcunque  compositae  legitimo  ritu  praefectus  esses,  aut  etiam  plebem  istic  haberes  tua  sedulitate  Christo  acquisitam,  cuius  oculi  in  te  ceu  ducem  ac  pastorem  converterentur,  nunquam  concederem,  ut  abiecta  temere  non  dubia  Domini  vocatione  libertatem  tibi  sumeres  alio,  quo  ferret  animus,  demigrandi.  Christianis  enim  (quos  in  sua  vocatione  perstare  decet)  aliena  est  desultoria  ista  levitas.  Sed  ab  hac  minime  recta  vivendi  via,  in  quam  te  Satana,  non  Domino,  vocante  contulisti,  quo  minus  pedem  referas,  quid  te  impediat  non  video.  Omnino  sane,  aut  tibi  quod  ab  episcopo  requiri  audis  praestandum  est,  aut  sedes  episcopi  deserenda.  Flebiles  illas  vestras  querimonias  novi:  quibus  si  quis  ad  indulgendam  vobis  veniam  non  permoveatur,  eum  non  hominem  esse  iudicatis.  Quid?  Ergone  fortunis  omnibus  exuti,  hinc  nos  velut  e  praesentaneo  incendio  proripiemus?  Quid  autem  fiet  miseris  nobis?  Scilicet  ut  qui  tranquille  [pag.  77]  ac  placide  in  nostro  habitamus,  vagi  ac  palantes  in  alienas  concedamus,  nobisque  incognitas  terras  ?  Quorum  largitate  vivunt  plurimi,  precariam  paene  vitam  aliorum  beneficio  agitemus?  Qui  deliciis  assuevimus,  non  sine  dignitate,  tenuiter,  aspere,  contumeliose  victitemus?  Quibus  nunc  otiosis  seritur  ac  metitur,  atrum  ex  iure  hesterno  panem,  ut  ille  inquit,  sudore  nostro  manibusque  partum  voremus  ?  Verum  adeo  speciosis  querelis  uno  verbo  respondeo.  Ergo  Christiani  ne  sitis.  Christianum  enim  haec  manet  necessitas,  ut  si  furabatur,  furari  iam  desinat  :  sed  manuum  labore  potius,  et  suae,  et  fratrum  inopiae  succurrat  (Ephes.  4,  28).  Grave  quidem,  non  secus  atque  abiecta  sui  cura,  subsidiis  praesentis  vitae  omnibus  exuere  se  ac  nudare:  sed  multo  gravius  haberi  debet,  tot  maleficiorum  conscientiam  sustinere,  cuius  flagellis  exagitari  te,  cuius  aculeis  perpetuo  lancinari  (si  tamen  Deum  vivere,  atque  alteram  quandam  in  eius  regno  vitam  fore  putas)  necesse  est.  Durum  et  istud  quoque  est,  fateor:  natale  solum,  ubi  et  amoenissime  et  honorifice  accipiaris,  aliena  regione,  in  qua  futurus  sis  abiectus  hospes,  exsilii  specie  vertere:  sed  multo  etiamnum  durius,  quoquo  te  vertas,  iudicium  hoc  circumferre.  Quod  ne  dubium