7:308  unquam  ex  ore  tuo  verbulum  auditum  est  de  his  rebus?  Quanquam  inepte  facio  qui  talem  zelum  requiro  ab  eo,  qui  susque  deque  omnia  reputat,  modo  habeat  ventrem  bene  refertum  et  aliquo  loco  censeatur.  Ad  istas  porro  criminationes,  quando  magna  ex  parte  sunt  maledici  conviciatoris  temere  iactata  probra,  nihil  respondeo,  nisi  quod  provoco  ad  rem  ipsam,  ut  inde  fiat  iudicium  de  nobis  et  papistis.  Et  nostri  abunde  variis  scriptis  tales  calumnias  diluerunt.  Et  propero  ad  praecipuam  quaestionem  et  quasi  omnium  certaminum  caput.  Quum  viderem,  inquit,  exsecrandas  in  Christi  [pag.  32]  divinitatem  blasphemias  et  sacrosanctam  personarum  trinitatem  inter  sciolos  quosdam  fraterculos  passim  palamque  proscindi  in  quotidianis  congressibus,  in  concionibus  publicis,  libris  editis,  synodis,  epistolis,  zelo  sincerae  fidei  succensus  amplius  dissimulare  non  valui,  quin  Bernates  de  tantis  blasphemiis,  idque  certis  fultus  testimoniis  suo  loco  producendis,  commonefacerem.  De  testimoniis  mox  videbimus,  et  ita  ut  palam  fiat  quam  bene  instructus  hanc  accusationem  susceperit,  nisi  quod  hic  obiter  monitos  velim  lectores,  ut  considerent,  quam  bene  haec  criminatio  cum  ea  quam  retuli  testificatione  congruat,  in  qua  asseruit  nullam  se  unquam  impiam  vocem  ex  ore  fratrum  audiisse,  nullum  impium  verbum  legisse  in  eorum  scriptis.  Mirum  est  autem  eum  tam  familiariter  assuetum  esse  mendaciis,  ut  tria  verba  contexere  nequeat,  quin  vel  in  tota  re  vel  in  aliqua  parte  mentiatur.  Zelo,  inquit,  sincerae  fidei  succensus  amplius  dissimulare  non  potui.  Mirificum  fidei  zelotem,  si  credimus  eius  testimonio.  Sed  operae  pretium  est  intelligere  ut  res  habeat.  Quum  nugas  illas  quas  postea  suo  loco  excutiemus  de  novo  purgatorio,  quod  comminiscebatur,  protulisset,  et  Bernam  vocatus  esset  ad  reddendam  rationem,  tandemque  causa  audita  ad  palinodiam  damnatus,  postea  autem  flenti  et  submisse  deprecanti  haec  ignominia  permissu  atque  adeo  rogatu  Calvini  et  Vireti  remissa  fuisset,  liberatus  [pag.  33]  omni  cura  exorsus  est  altis  cothurnis  hanc  tragoediam  ex  insperato.  Tale  autem  fuit  orationis  initium  prope  ad  verbum:  Pro  gloria  Dei,  pro  honore  dominorum  Bernensium,  pro  sinceritate  fidei,  pro  unitate  ecclesiae,  pro  tranquillitate  publica,  pro  officii  mei  debito,  habeo  aliquid,  venerandi  domini,  quod  vobis  exponam,  quod  diu  tacui  ac  dissimulavi.  Nam  multi  concionatores  tam  Genevae  quam  in  ditione  vestra  Ariana  impietate  infecti  sunt.  Ac  simul  longum  catalogum  recensuit  piorum  fratrum  non  absque  magno  omnium  stupore.  Res  in  consistorio,  hoc  est  iudicio  ecclesiastico,  agebatur  latina  lingua.  Probationes  nullae  audiebantur,  nec  ipse  etiam  eo  pervenire  volebat,  contentus  hoc  venenum  evomuisse  sui  ulciscendi  causa.  Sed  Calvinus  subita  respon-