50:308  pure  fumee,  et  qu'en  la  fin  on  cognoistra  que  le  diable  a  mis  en  avant  quelques  sornetes  pour  abuser  les  poures  fols  qui  ne  peuvent  s'arrester  du  tout  a  la  verite  de  Dieu.  Il  n'y  a  rien  autre  (dit-il)  sinon  qu'aucuns  vous  troublent  II  est  vray  que  ce  mot  Autre,  emporte  qu'il  n'y  a  rien:  mais  tant  y  a  cependant  que  sainct  Paul  declare  que  les  Galatiens  auront  beau  alleguer  que  ceux  qui  estoyent  venus  de  Ierusalem  et  du  pays  de  Iudee  leur  ont  remonstre  qu'ils  ne  devoyent  pas  separer  la  Loy  d'avec  l'Evangile:  Non  non  (dit-il)  il  n'y  a  qu'un  Iesus  Christ:  aussi  il  n'y  a  qu'une  doctrine  laquelle  nous  conduise  a  luy,  et  nous  entretienne  en  la  foy,  par  laquelle  nous  obtenons  salut  par  son  moyen.  Ainsi  tous  ceux  qui  cerchent  d'adherer  et  demeurer  en  la  pure  cognoissance  de  l'Evangile,  il  ne  faut  point  qu'ils  cerchent  une  autre  perfection,  et  ceux  qui  veulent  passer  outre,  ce  sont  des  brouillons  qui  renversent  et  pervertissent  tout.  Or  ce  mot-ci  est  bien  a  noter,  a  fin  que  nous  cognoissions  quand  nostre  Seigneur  nous  a  fait  ce  bien  de  nous  enseigner  en  son  eschole,  qu'il  ne  nous  faut  plus  avoir  un  arrest  et  une  resolution,  pour  dire,  Voila  en  quoy  nous  avons  a  vivre  et  a  mourir.  Or  on  en  verra  beaucoup  qui  ne  contrediront  pas  manifestement  a  la  doctrine  de  l'Evangile,  et  mesmes  souffriront  qu'on  presche  la  grace  de  nostre  Seigneur  Iesus  Christ.  Si  on  leur  demande  que  c'est  qu'ils  y  trouvent  a  redire,  Rien:  mais  apres,  qu'il  y  ait  un  autel  pare  et  des  marmousets  dessus,  ils  y  courent  aussi  bien,  ils  iront  ouir  la  messe  et  tout  le  reste  de  ces  folies  de  la  Papaute,  ce  leur  est  tout  un:  et  quand  tous  ces  erreurs  leur  seront  mis  en  avant,  ils  ne  pensent  pas  qu'il  y  ait  nulle  difference.  Or  notons  qu'une  telle  brutalite  monstre  qu'il  n'y  a  nulle  foy  en  eux.  Et  pourquoy?  Voila  en  quoy  nous  pourrons  monstrer  et  mesmes  sentir,  quant  a  nous,  si  nous  sommes  fideles,  c'est  a  scavoir  ayans  discretion  de  l'Evangile,  pour  conclure  que  c'est  la  verite  infaillible  de  Dieu,  et  qu'elle  ne  nous  peut  esgarer  quand  nous  la  suyvrons.  Or  au  contraire,  les  Papistes  ont  imagine  une  foy  (qu'ils  appellent)  enveloppee  et  ce  leur  est  assez,  encores  que  les  poures  personnes  ne  cognoissent  rien,  qu'ils  disent,  Voila  ie  m'en  rapporte  a  nostre  mere  saincte  Eglise:  ie  croy  ce  qu'elle  tient.  Or  ceux-la  monstrent  apertement  qu'ils  n'ont  nulle  foy,  et  qu'ils  ne  scavent  par  quel  moyen  il  faut  estre  sauve.  Cependant  il  nous  est  dit  que  nous  obtenons  iustice  et  salut  par  foy,  voire  d'autant  que  nous  embrassons  Iesus  Christ,  comme  celuy  auquel  tous  biens  nous  sont  communiquez.  Quand  donc  nostre  Seigneur  Iesus  Christ  est  incognu,  il  n'y  a  plus  la  nulle  foy,  et  c'est  une  illusion  trop  lourde  de  Satan  qui  a  ensorcele  les  docteurs  de  la  Papaute  de  parler