25:308  quam  ambitiosum  praeconium.  Si  quaeratur  quomodo  id  toleratum  fuerit:  in  promptu  est  responsio:  sic  invaluisse  tunc  licentiam  apud  orientales  populos,  ut  nemo  putaret  illicitum  quod  passim  apud  omnes  in  usu  erat.  Idque  vidimus  antea  diserte  notari,  ubi  Deus,  incestuosa  coniugia  vetando,  populum  suum  ab  aliis  gentibus  discernit.  Nihil  ergo  mirum,  si  nondum  lege  Dei  prohibiti,  vulgatum  morem  sequuti  sunt.  60.  Natique  sunt  ipsi  Aharon.  Quum  ex  quatuor  filiis  duo  subita  morte  fuerunt  abrepti,  periclitari  visa  est  summi  sacerdotii  dignitas,  quae  a  duorum  hominum  vita  pendebat.  Atque  hoc  consilio  historiam  prius  narratam  repetit  Moses,  ut  in  conservatione  eius  ordinis,  cui  annexa  erat  totius  ecclesiae  salus,  clarius  cernatur  admirabilis  Dei  providentia.  Certe  nisi  in  aliis  familiis  longe  maior  viguisset  foecunditas,  tota  tribus  Levi  perquam  exiguo  numero  constitisset.  Imo  si  fiat  comparatio,  incredibilis  erit  copia,  ubi  viginti  tria  millia  numerantur,  quum  duo  tantum  capita  cum  suis  liberis  haberent  genus  sacerdotale.  Sed  Deus  ecclesiae  suae  excellentiam  per  modos  et  gradus  humanitus  incognitos  ad  summum  attollit,  quo  melius  in  hac  humilitate  emineat  eius  potentia.  Porro  causa  mortis  iterum  exprimitur,  ut  exemplo  admoniti  sacerdotes,  non  tantum  a  voluntariis  sacrilegiis,  sed  ab  errore  et  negligentia  diligentius  sibi  caveant.  36.  Isti  sunt  numerati  Mosis  et  Eleazar.  Priores  recogniti  fuerant  sub  Aharon.  Descrimen  ergo  notatur  inter  duos  census:  ut  ita  sibi  transitum  faciat  Moses  ad  commemorandum  Dei  iudicium,  quod  nunquam  satis  attente  expendi  potest,  ex  sexcentis  millibus  tantum  duos  fuisse  repertos  qui  tempus  a  Deo  praefixum  superarent.  Si  quis  excipiat,  maximam  partem  suo  fato  esse  defunctam,  qui  iam  annum  tricesimum  et  quadragesimum,  imo  quinquagesimum  excesserant,  atque  ita  octogenarii  fuissent  ante  completum  hoc  tempus  quadraginta  annorum:  fateor  id  verum  esse:  sed  multi  nondum  vicesimum  quartum  annum  attigerant.  Nec  dubium  quin  ex  illis  non  pauci  fuerint  iuniores  Iosue  et  Caleb,  quos  scimus  non  modo  vegetos  fuisse  et  integros  multis  post  annis,  sed  etiam  robustos.  Ergo,  ut  minimum,  dimidiam  partem  non  senectus,  sed  Dei  ultio  immatura  morte  abstulit,  ac  si  eos  sua  manu  palam  e  coelo  feriret.  Itaque  non  abs  re  Moses  recitat  mortuos  esse,  sicuti  pronunciaverat  Deus  :  non  tantum,  ut  poena  de  illis  sumpta  nos  ad  timorem  Dei  erudiat,  sed  ut  discamus  ad  eius  minas  serio  expergefieri.