1:308  [A  19;  B  16;  C  16.  novamini  spiritu  mentis  vestrae  et  induite  novum  hominem  qui  secundum  Deum  creatus  est  in  iustitia  et  sanctitate  veritatis.  Item  (Col.  3,  9):  Nolite  mentiri  invicem,  exuti  veteri  homine  cum  actionibus  suis,  et  induti  novum,  qui  renovatur  ad  agnitionem  et  imaginem  eius  qui  creavit  illum.  Vides  ut  imaginem  Dei  interpretatur,  conformitatem  quam  spiritus  noster  habet  cum  Domino,  ubi  terrena  sorde  repurgatus  nihil  nisi  coelestem  puritatem  spirat?  Similiter  quum  alibi  docet  (2  Cor.  3,18),  Dei  gloriam  ita  conspicuam  nobis  repraesentari  in  evangelio,  ut  in  eius  imaginem  transformemur  spiritus  sancti  virtute,  nihil  ambiguitatis  relinquit,  quin  imago  ipsa  interius  sit  animae  bonum,  et  per  spiritualem  regenerationem  in  nobis  instauretur.  Ergo  ad  imaginem  Dei  conditus  homo  iis  dotibus  praeditus  fuit,  quae  beneficentiam  creatoris  largissimam  erga  ipsum  testarentur.  Bonorum  enim  omne  genus  participatione  cum  ipso  adhaerebat,  eorum  nexu  perpetuo  cum  eo  victurus,  si  in  ea  modo  quam  acceperat  integritate  stetisset.  Verum  non  diu  stetit,  sed  sua  protinus  ingratitudine  tot  sibi  collatis  beneficiis  indignum  se  reddidit.  Hic  illa  coelestis  imago  inducta  et  obliterata  fuit;  quia  per  peccatum  a  Deo  alienatus  1)  simul  a  bonorum  omnium  communione  necessario  excidit,  quae  nonnisi  in  ipso  haberi  possunt.  Ita  in  locum  sapientiae,  virtutis,  sanctitatis,  veritatis,  iustitiae,  quibus  ornamentis  illum  vestiebat  Dei  similitudo,  cesserunt  teterrimae  pestes,  ignorantia,  impotentia,  impuritas,  vanitas,  iniustitia:  quibus  miseriis  immersus  et  obvolutus  iisdem  suam  quoque  progeniem  implicuit.  Eius  enim  imaginem  referunt  a  quo  ducunt  originem  et  parentis  sui  pollutione  contaminati  nascuntur.  8.  Haec  est  haereditaria  corruptio  quam  peccatum  originale  veteres  nuncuparunt,  peccati  vocabulo  naturae  antea  bonae  et  purae  depravationem  designantes.  Qua  de  re  multam  cum  Pelagianis  concertationem  habuerunt.  Nam  isti  quum  evincerentur  manifesto  scripturae  testimonio  peccatum  a  primo  homine  transiisse  in  totam  posteritatem,  cavillabantur  transiisse  per  imitationem,  non  propaginem.  Ergo  boni  viri  in  hoc  elaborarunt,  ac  prae  aliis  Augustinus,  ut  ostenderent,  nos  non  ascita  nequitia  corrumpi,  sed  ingenitam  vitiositatem  ab  utero  matris  afferre.  Quod  inficiari  summae  impudentiae  fuit.  Sed  Pelagianorum  et  Coelestianorum  temeritatem  non  mirabitur  qui  ex  illius  sancti  viri  monumentis  perspexerit  quam  fuerint  in  aliis  omnibus  perditae  frontis  bestiae.  Certe  non  ambiguum  est  quod  confitetur  David  (Psal.  51,  7),  se  in  iniquitatibus  genitum,  et  in  peccato  conceptum  a  matre.  Non  arguit  illic  patris  aut  matris  delicta;  sed,  quo  Dei  erga  se  bonitatem  melius  commendet,  propriae  perversitatis  1)  add  homo  1550  et  seqq.