51:307  307  SERMON  Y  308  Et  pourquoy?  Quand  le  S.  Esprit  domine  en  nos  coeurs,  nous  avons  de  quoy  nous  glorifier  au  milieu  de  toutes  nos  tentations,  comme  il  est  dit  au  8.  chapitre  des  Rom.,  que  non  seulement  nous  pouvons  invoquer  Dieu,  estans  asseurez  qu'il  nous  tient  au  nombre  de  ses  enfans:  mais  aussi  combien  que  nous  soyons  affligez  et  tormentez,  si  est-ce  que  nous  ne  laissons  pas  de  tousiours  avoir  cela  pour  resolu  et  infaillible,  qu'il  est  nostre  Pere,  pour  nous  conduire  a  la  gloire  celeste.  Car  voila  aussi  comme  nostre  esperance  s'approuve.  Au  reste,  nous  sommes  aussi  admonnestez  de  cheminer  en  patience  :  puis  que  Dieu  nous  a  donne  son  sainct  Esprit  pour  arres,  que  nous  ne  soyons  point  si  hastifs  et  bouillans  comme  nous  avons  accoustume.  Car  si  Dieu  nous  traitte  rudement,  incontinent  nous  entrons  en  murmures  et  sommes  bien  tost  ennuyez  de  souffrir:  car  nous  voyons  combien  nous  sommes  tendres  et  delicats  de  nature.  Or  si  nous  faut-il  endurer  en  patience,  puis  qu'ainsi  est  que  Dieu  ne  nous  veut  pas  faire  venir  d'un  saut  (comme  on  dit)  en  son  royaume:  mais  qu'il  veut  que  nous  passions  par  ce  monde  au  milieu  de  beaucoup  d'espines  et  de  ronces,  que  nous  ayons  beaucoup  de  difficultez,  que  nous  soyons  en  destresse.  Puis  qu'ainsi  est  qu'il  nous  veut  mener  par  un  tel  chemin,  et  cependant  qu'il  nous  donne  un  si  bon  remede  qu'il  nous  doit  bien  suffire,  c'est  qu'il  nous  conferme  en  une  constance  invincible  par  son  S.  Esprit,  que  nous  soyons  apprestez  a  combatre  iusqu'a  ce  que  le  temps  de  la  victoire  soit  accompli.  Il  est  vray  qu'auiourd'huy  nostre  foy  est  desia  victorieuse,  mais  nous  n'en  recevons  pas  le  fruict,  nous  n'en  avons  pas  pleine  iouissance.  Il  nous  faut  donc  resoudre  de  tousiours  gemir  et  souspirer,  et  cependant  nous  esiouir:  car  ce  ne  sont  pas  choses  incompatibles  que  nous  crions  avec  sainct  Paul,  Helas,  malheureuse  creature  que  ie  suis,  qui  est-ce  qui  me  delivrera  de  ceste  prison  de  mon  corps?  Que  chacun  donc  se  plaigne,  voire  en  se  despitant,  a  cause  que  nous  sommes  encores  tant  adonnez  a  nos  meschantes  cupiditez  et  a  tant  de  vices  qui  sont  en  nous.  Et  cependant  que  nous  ne  laissions  pas  aussi  de  dire  que  nous  rendons  graces  a  Dieu,  nous  contentans  de  ce  qu'il  nous  a  donne  une  telle  portion  qu'il  nous  doit  bien  suffire,  attendans  qu'il  accomplisse  et  parface  ce  qu'il  a  commence,  quand  nous  avons  ainsi  son  sainct  Esprit  qui  habite  en  nous  et  que  nous  avons  la  promesse  que  nous  n'en  serons  iamais  destituez  iusques  en  la  fin.  Voila  donc  comme  nous  sommes  ici  exhortez  a  prendre  le  frein  aux  dents  et  cheminer  en  telle  constance,  que  toutes  les  miseres  du  monde  n'empeschent  pas  que  nous  ne  poursuyvions  nostre  course,  iusques  a  ce  que  nous  soyons  parvenus  a  nostre  but.  Et  voila  pourquoy  notamment  sainct  Paul