51:306  apparu,  et  faut  que  nous  attendions  le  iour  auquel  nous  serons  semblables  a  Dieu,  et  alors  nous  aurons  clairte  pour  voir  en  toute  perfection  ce  que  maintenant  nous  croyons.  Et  puis  nous  avons  veu  en  la  seconde  Epistre  des  Corinthiens,  que  sainct  Paul  disoit,  que  cependant  que  nous  sommes  en  ce  pelerinage  terrien,  nous  sommes  comme  absens  de  Dieu.  Et  pourquoy?  Nous  cheminons  (dit-il)  en  esperance,  et  ne  voyons  point  encores  la  chose  comme  estant  presente:  mais  nous  la  voyons  par  foy.  Brief,  combien  que  nous  soyons  passez  de  mort  a  vie  (comme  il  est  dit  au  cinquieme  chapitre  de  sainct  Iean),  si  est-ce  que  nous  combatons  tousiours  contre  un  nombre  infini  de  morts,  d'autant  que  nous  en  sommes  assiegez.  Et  sainct  Paul  en  ce  passage  conioint  bien  tous  les  deux.  Car  d'un  coste  il  dit  que  nous  ne  sommes  point  encores  parvenus  a  nostre  redemption  et  a  nostre  heritage  :  mais  cependant  il  monstre  que  nous  ne  laissons  pas  d'estre  asseurez  pourtant,  et  qu'il  n'y  a  rien  qui  nous  empesche  sinon  nostre  ingratitude,  de  nous  glorifier  pleinement  en  Dieu  et  dire  a  pleine  bouche  que  nous  ne  craignons  pas  de  parvenir  a  la  vie  celeste,  puis  qu'ainsi  est  que  nous  en  avons  les  arres  par  le  sainct  Esprit,  et  que  nous  sommes  tellement  conioints  avec  nostre  Seigneur  Iesus  Christ,  que  tous  les  biens  qu'il  a,  nous  appartiennent  et  nous  sont  communiquez  par  foy.  Notons  bien  donc  ce  qui  est  ici  contenu  en  ces  mots  de  sainct  Paul.  Il  dit  que  le  sainct  Esprit  est  nostre  arre:  puis  quJil  est  nostre  arre,  il  faut  bien  que  nous  soyons  asseurez  de  nostre  redemption,  de  laquelle  nous  serons  en  possession  au  dernier  iour,  voire  en  toute  perfection.  Et  aussi  la  chose  le  monstre  assez:  car  nous  ne  sommes  que  povres  vers  de  terre,  nous  sommes  environnez  de  pourriture  et  de  corruption,  nous  sommes  subiets  a  tant  de  miseres  que  c'est  pitie:  le  monde  nous  maudit,  et  se  moque  de  nous  et  de  nostre  simplicite,  nous  avons  a  endurer  faim  et  soif,  il  semble  souvent  que  Dieu  nous  ait  abandonnez,  qu'il  nous  ait  comme  retranchez,  mesmes  qu'il  ne  daigne  pas  avoir  pitie  de  nous,  comme  des  creatures  les  plus  contemptibles  du  monde:  voila  comme  nous  en  sommes  quant  a  l'apparence.  Et  ainsi  il  faut  bien  qu'il  y  ait  un  remede  pour  nous  certifier  au  milieu  de  tant  de  perplexitez  et  angoisses.  Voila  pourquoy  notamment  S.  Paul  dit  que  le  sainct  Esprit  est  nostre  arre.  Combien  donc  que  le  monde  ait  la  bride  avalee  pour  nous  tenir  le  pied  sur  le  ventre,  comme  on  dit,  combien  que  nostre  Seigneur  nous  exerce  par  beaucoup  de  tentations,  combien  qu'il  nous  humilie  en  telle  sorte  qu'il  semble  que  nous  soyons  comme  moutons  destinez  a  la  boucherie,  que  nous  avons  tousiours  la  mort  entre  les  dents:  tant  y  a  que  nous  ne  sommes  point  despourveus  de  bon  remede.  20