1:305  A  17;  B  15;  C  15.]  CAP.  II.  DE  COGNITIONE  HOMINIS.  CAPUT  SECUNDUM.  DE  COGNITIONE  HOMINIS,  ET  LIBERO  ARBITRIO.  1)  Ubi  de  peccato  originali,  de  naturali  hominis  corruptione,  de  liberi  arbitrii  impotentia:  item  de  gratia  regenerationis,  et  auxilio  spiritus  sancti  disputatur.  1.  Non  sine  causa  veteri  proverbio  tantopere  homini  commendata  semper  fuit  cognitio  sui  ipsius;  nam  si  turpe  ignorare  ducitur  quaecunque  ad  humanae  vitae  rationem  pertinent,  multo  vero  foedior  ignorantia  nostri  est:  qua  fit  ut  in  capiendo  de  re  qualibet  necessaria  consilio  misere  hallucinemur  atque  adeo  caecutiamus.  Verum  quo  utilior  est  praeceptio,  eo  diligentius  videndum  est  nobis  ne  ipsa  praepostere  abutamur,  quod  philosophis  quibusdam  videmus  accidisse.  Illi  enim,  dum  hominem  hortantur  ut  se  ipsum  noverit,  finem  simul  proponunt,  ne  dignitatem  excellentiamque  suam  nesciat,  neque  aliud  ipsum  in  se  contemplari  volunt,  quam  unde  inani  fiducia  intumescat  et  superbia  infletur.  2.  Nobis  autem  longe  aliud  quaerendum  in  excutiendis  nobis  praescribit  Dei  veritas:  nempe  talem  exigit  notitiam,  quae  nos  et  ab  omni  propriae  facultatis  confidentia  procul  avocet,  et  omni  gloriandi  materia  destitutos  ad  submissionem  adducat.  Quam  regulam  tenere  convenit,  si  ad  rectam  et  sapiendi  et  agendi  metam  pertingere  libet.  Neque  me  latet  quanto  plausibilior  sit  illa  sententia,  quae  ad  recognoscenda  nostra  bona  potius  nos  invitat,  quam  ad  pauperiem,  ignominiam,  turpitudinem,  imbecillitatem  inspiciendam.  Siquidem  nihil  est  quod  magis  appetat  humanum  ingenium,  quam  blanditiis  demulceri;  atque  ideo,  ubi  dotes  suas  magnifieri  audit,  in  hanc  partem  nimia  credulitate  propendet.  Quo  minus  mirum  est  hic  adeo  perniciose  fuisse  a  maxima  hominum  parte  aberratum.  Nam  quum  sit  ingenitus  universis  mortalibus  plusquam  caecus  sui  amor,  libentissime  sibi  persuadent  nihil  inesse  sibi  quod  merito  debeat  esse  odiosum.  Ita,  sine  alieno  patrocinio,  vanissima  haec  opinio  fidem  passim  obtinet:  hominem  sibi  abunde  sufficere  ad  bene  beateque  vivendum.  Quod  si  qui  modestius  sentire  volunt,  utcunque  aliquid  Deo  concedant,  ne  sibi  arrogare  omnia  videantur,  sic  tamen  partiuntur,  ut  potissima  et  gloriae  et  fiduciae  materia  semper  apud  se  resideat.  3.  Iam  si  accedit  oratio,  quae  sponte  prurientem  in  hominis  medullis  superbiam  suis  illecebris  titillet,  nihil  est  quod  magis  arrideat.  Proinde  ut  unusquisque  humanae  naturae  praestantiam  benignis-  1)  Et  libero  arbitrio.  Haec  absunt  inde  ab  a.  1543  et  pro  iis  longior  additur  formula.  Calvini  opera.  Vol.  I.