7:304  crassis  foedisque  mendaciis  deprehendimus.  Sed  quis  fidem  habeat,  etiam  si  caput  suum  diris  omnibus,  aram  tenens,  centies  devoveret?  Quo  autem  testimonio  ostendemus  ipsum  mentiri?  Nempe  vivunt  adhuc  complures  probi  viri,  qui  sciunt  non  rogatum  modo,  sed  obsecratum  saepius  a  Farello  et  Vireto  fuisse,  ut  strenue  susceptam  papistae  personam  tueretur.  In  suggestu  hoc  saepius  publice  dictum  fuit.  Sed  privatim  etiam  de  hac  re  serio  interpellatus  fuit.  Et  quid  opus  fuit  mitigari  a  Farelli  studiosis  eius  vehementiam?  Causam  reddit.  Quia  Farellus  et  Viretus  sibi  solvendo  non  essent.  Huius  rei,  quia  idoneus  [pag.  24]  iudex  non  est,  iudicium,  opinor,  penes  auditores  esse  debet.  Illi  autem  tenent  memoria,  adeoque  pueri  et  mulierculae  adhuc  hodie  narrant,  ut  saepius  hians  obmutuerit,  quum  a  Vireto  provocaretur.  Porro,  an  ullo  in  apiculo  restent  adhuc  illi  debitores  Farellus  et  Viretus,  ex  actis  constat,  quae,  ne  statim  publicarentur,  solus  Carolus  obstitit.  Estne  credibile  viros  illos,  non  stupidos  nec  nullius  iudicii  ac  prudentiae,  scientes  ac  volentes  suam  inscitiam  voluisse  mundo  prodere?  Alterum  mendacium  est  quod  subiicit,  se  bona  fide  certasse  pro  catholicis  adversus  Farellum  et  Viretum.  Fatetur  autem  a  notariis  exceptam  totam  disputationem  fuisse.  Est  autem  in  actis  perscriptum,  quacunque  de  re  movisset  quaestionem  Carolus,  praefatum  semper  fuisse,  non  ideo  se  contendere,  quod  doctrinam  Farelli  et  Vireti  improbaret:  sanctum  enim  esse  et  orthodoxum  quod  posuerant,  seque  toto  animo  amplecti  absque  controversia  eorum  sententiam:  sed  tantum  ut  clarius  innotesceret  quam  fortis  sit  ac  invicta  Christi  veritas  adversus  omnia  papistarum  tela.  Si  pro  catholica  fide  certabat  cum  haereticis,  talis  praefatio  exsecrabili  in  Deum  blasphemia  non  carebat.  Si  sentiebat  aliquid  esse  in  axiomatis  tunc  propositis  dissentaneum  a  verbo  Domini,  qua  conscientia  omnibus  assentiebatur,  seque  in  illo  consensu  victurum  ac  moriturum  asserebat?  Quid  ad  haec  respondebit?  [pag.  25]  Arguetne  falsitatis  iuratos  scribas?  Acta  authentica  repudiabit?  Sed  quid  tali  improbitate  consequetur,  nisi  ut  magis  ac  magis  infamiam  suam  augeat?  Vivunt  etiam  hodie  plus  quam  mille  testes,  qui  solennem  illam  protestationem  subinde  ab  eo  repetitam  fuisse  dicent.  Eat  nunc,  et  gratiam  hac  mentiendi  impudentia  a  suis  Sorbonicis  aucupetur.  Quin  etiam,  quum  ad  missam  ventum  esset,  confitebatur  opinionem  sacrificii,  quam  habent  papistae,  abominandum  esse  sacrilegium  et  mortis  Christi  abnegationem,  commentum  de  corporali  praesentia  falsum  esse  et  alienum  a  scripturis,  adorationem  sacramenti  horrendam  esse  idololatriam.  Quem  nunc  papistis  blandiendi  locum  habet,  quos  tam  atrociter  damnavit  et  quorum  praecipuum  Deum,  hoc  est  sacram  missam,  tot  probris  affecit?