51:304  est  vray  que  pour  parler  proprement,  il  devoit  dire,  L'Evangile  a  este  seelle:  mais  a  fin  de  nous  advertir  que  la  faute  vient  et  procede  de  nous,  et  que  l'Evangile  de  soy  est  une  doctrine  assez  authentique,  il  a  voulu  monstrer  que  quand  Dieu  seelle  sa  verite,  c'est  au  regard  de  ce  que  nous  sommes  si  difficiles,  et  que  nous  chancelons,  et  que  nous  sommes  comme  roseaux  branlans  et  agitez  a  tous  vents,  iusques  a  ce  qu'il  nous  ait  fortifiez.  Mais  quoy  qu'il  en  soit,  notons  bien  que  le  sainct  Esprit  est  comme  ie  seau  par  lequel  il  nous  ratifie  sa  verite.  Or  i'ay  desia  declaire  combien  cela  nous  est  necessaire:  car  combien  que  nous  confessions  que  la  parole  de  Dieu  merite  d'estre  receue  sans  contredit  ni  replique,  si  est-ce  que  nous  ne  laissons  pas  d'en  douter,  et  nous  en  sommes  assez  convaincus.  Car  quand  il  nous  vient  quelque  trouble  et  fascherie,  nous  sommes  gens  esperdus:  et  si  nous  estions  bien  asseurez  de  la  bonte  de  Dieu,  comme  il  nous  la  certifie,  il  est  certain  que  nous  ne  serions  pas  en  tel  effroy.  Toutes  les  tentations  donc  qui  nous  esbranlent,  monstrent  assez  que  nous  ne  profitons  pas  comme  nous  devons  en  l'Evangile  de  Dieu.  Ainsi,  il  faut  bien  qu'il  l'authorise  de  son  coste  par  son  sainct  Esprit,  et  qu'il  l'imprime  en  nos  coeurs  avec  telle  certitude  que  nous  puissions  estre  constans,  et  que  ceste  fermete-la  ne  puisse  estre  abatue  par  tout  ce  que  le  diable  pourra  esmouvoir,  et  qu'il  machinera  pour  renverser  nostre  foy.  Et  nous  comprendrons  encores  mieux  cela,  faisant  tousiours  examen  tel  que  i'ay  dit  de  nostre  foiblesse.  Car  nous  pourrions  prendre  toutes  les  raisons  de  ce  monde,  si  est-ce  que  nous  ne  serons  pas  encores  pleinement  certifiez,  et  tant  qu'il  est  besoin,  que  Dieu  nons  vueille  estre  propice,  et  qu'au  milieu  de  tant  de  perils  de  ce  monde  il  nous  ait  en  sa  protection.  Car  nous  sommes  ici  comme  en  une  mer,  les  vents  et  tempestes  se  dressent  a  chacune  minute,  et  ne  faudroit  rien  pour  nous  engloutir.  Comment  donc  pourrions-nous  despiter  Satan,  estans  comme  povres  brebis  despourveus  et  d'armes  et  de  moyens,  et  de  tout?  Comment  pourrions-nous  nous  esiouir  et  en  la  vie  et  en  la  mort,  scachant  que  Satan  ne  pourra  rien  contre  nous,  sinon  que  nous  fussions  bien  seellez  et  d'une  facon  authentique?  Ainsi  outre  ce  que  nous  sommes  exhortez  en  ce  passage  de  nous  despouiller  de  toute  presomption  et  outrecuidance,  a  fin  que  Dieu  seul  soit  loue  et  magnifie,  quant  et  quant  nous  pouvons  recueillir  des  mots  de  S.  Paul,  que  nous  avons  des  armes  pour  bien  combatre  et  batailler:  combien  que  nostre  ennemi  soit  puissant  et  robuste,  que  iamais  nous  ne  serons  vaincus,  moyennant  que  nous  facions  valoir  ce  qui  est  ici  dit,  c'est  a  scavoir  que  l'Esprit  de  Dieu  nous  seele  la  verite  et  certitude  des  promesses  de  l'Evangile.