50:304  cest  erreur-la,  qu'il  faloit  garder  les  figures  anciennes,  c'est  comme  si  on  presentoit  a  Dieu  un  service  meritoire.  Or  il  faut  que  nostre  salut  soit  gratuit  ou  Iesus  Christ  n'est  plus  rien.  Nous  l'appelons  salut  gratuit,  d'autant  qu'il  nous  est  donne  simplement  de  Dieu,  quand  nous  n'apportons  autre  chose  sinon  un  desir  affame  de  ce  qui  nous  defaut,  a  fin  d'en  estre  remplis.  Il  est  donc  question  de  venir  comme  poures  mendiants  a  Dieu,  si  nous  voulons  estre  iustifiez  au  nom  de  nostre  Seigneur  Iesus  Christ:  car  si  nous  imaginons  une  seule  goutte  de  merite,  cela  nous  empesche  de  venir  a  nostre  Seigneur  Iesus  Christ.  Et  non  sans  cause  il  est  dit  par  un  ancien  docteur,  que  nous  ne  pouvons  recevoir  ce  ijui  nous  est  presente  de  salut  en  nostre  Seigneur  Iesus  Christ,  sinon  quand  nous  aurons  efface  la  memoire  de  tous  merites,  et  que  nous  cognoistrons  qu'il  n'y  a  en  nous  que  toute  pourete.  Voila  donc  pourquoy  sainct  Paul  a  eu  encores  plus  iuste  raison  de  dire  que  les  Galatiens  s'estoyent  ainsi  transportez  de  Iesus  Christ  et  de  Dieu  son  Pere.  Or  il  y  a  aussi  ceste  obligation  qu'on  leur  faisoit  accroire  ce  qu'on  vouloit  pour  les  assubietir  a  une  contrainte  servile,  et  pour  leur  oster  le  repos  de  conscience  que  nous  devons  avoir  en  nostre  Seigneur  Iesus  Christ.  Outre  ce  que  nous  sommes  reconciliez  par  le  sacrifice  de  sa  mort  et  passion,  nous  sommes  quant  et  quant  affranchis  de  la  rigueur  de  la  Loy,  sous  laquelle  nous  estions  detenus  en  servitude.  Exemple:  voila  ce  qui  estoit  dit  (comme  nous  verrons  plus  a  plein:  car  ie  ne  fay  que  d'esbaucher  les  matieres:  mais  nous  en  verrons  la  deduction  plus  ample).  Il  est  donc  dit  en  la  Loy  que  tous  ceux  qui  n'auront  accompli  ce  que  Dieu  commande  iusques  au  dernier  article,  seront  maudits.  Or  il  nous  est  impossible  de  venir  a  telle  perfection.  Il  faut  donc  que  nostre  Seigneur  Iesus  Christ  nous  ait  acquis  la  liberte:  que  la  Loy  ne  nous  tienne  plus  sous  son  ioug  qui  nous  estoit  insupportable,  comme  il  est  dit  au  15.  chapitre  des  actes.  Maintenant  en  somme  nous  voyons  pourquoy  S.  Paul  accuse  les  Galatiens  de  s'estre  revoltez  comme  pariures  a  Dieu  et  a  nostre  Seigneur  Iesus  Christ,  luy  ayans  fraude  et  quitte  la  foy  qu'ils  luy  avoyent  promise.  Or  par  cest  exemple  nous  sommes  admonnestez  de  nous  tenir  a  la  pure  doctrine  et  simplicite  de  l'Evangile,  sans  vaguer  ne  ca  ne  la.  Car  ce  n'est  point  assez  d'avoir  le  nom  et  le  titre  de  Chrestiens:  voire  non  plus  que  de  porter  la  marque  du  Baptesme:  mais  il  nous  faut  persister  en  la  doctrine  qui  est  contenue  en  l'Evangile.  Car  (comme  desia  nous  avons  dit)  nostre  Seigneur  Iesus  Christ  ne  se  peut  renoncer:  et  quand  nous  aurons  resve  ceci  et  cela,  si  faut-il  que  nous  le  cognoissions  tel  qu'il  nous  a  este  donne