1:304  [A  15;  B  13;  C  13.  petito,  praedicari  ;  deinde  commemorari  eius  virtutes,  quibus  nobis  describitur,  non  quis  sit  apud  se,  sed  qualis  erga  nos,  ut  ista  eius  agnitio  vivo  magis  sensu,  quam  vacua  et  meteorica  speculatione  constet.  Virtutes  porro  easdem  hic  enumerari  audimus,  quas  notabamus  in  coelo  et  terra  relucere:  clementiam,  bonitatem,  misericordiam,  iustitiam,  iudicium,  veritatem.  Nam  virtus  et  potentia,  sub  titulo  Elohim  continetur.  Iisdem  etiam  epithetis  illum  insigniunt  prophetae,  quum  ad  plenum  volunt  sanctum  eius  nomen  illustrare.  Ne  multa  congerere  cogamur,  in  praesentia  nobis  Psalmus  unus  sufficiat  (Ps.  145)  in  quo  tam  exacte  summa  omnium  eius  virtutum  recensetur,  ut  nihil  omissum  videri  queat.  Et  nihil  tamen  illic  ponitur,  quod  non  liceat  in  creaturis  contemplari.  Adeo  talem  sentimus,  experientia  magistra,  Deum,  qualem  se  verbo  declarat.  Apud  Ieremiam  (9,  23),  ubi  pronuntiat,  qualis  agnosci  a  nobis  velit,  descriptionem  proponit  non  ita  plenam,  sed  eodem  semper  recidentem.  Qui  gloriatur,  inquit,  in  hoc  glorietur,  quod  me  noverit  Dominum,  qui  facio  misericordiam,  iudicium  et  iustitiam  in  terra.  Tria  certe  haec  apprime  nobis  cognitu  sunt  necessaria.  Misericordia,  qua  sola  consistit  nostra  omnium  salus;  iudicium,  quod  in  flagitiosos  quotidie  exercetur  et  gravius  etiam  eos  manet  in  aeternum  exitium;  iustitia,  qua  conservantur  fideles  et  benignissime  foventur.  Quibus  comprehensis,  te  abunde  habere  vaticinium  testatur,  quo  possis  in  Deo  gloriari.  Neque  tamen  ita  omittuntur  aut  veritas  eius,  aut  potentia,  aut  sanctitas,  aut  bonitas.  Quomodo  enim  constaret,  quae  hic  requiritur,  iustitiae,  misericordiae,  iudicii  eius  scientia,  nisi  veritate  eius  inflexibili  niteretur?  Et  quomodo  crederetur  terram  iudicio  et  iustitia  moderari,  nisi  intellecta  eius  virtute?  Unde  autem,  nisi  ex  bonitate,  misericordia?  Si  denique  viae  omnes  eius  sunt  misericordia,  iudicium,  iustitia,  in  illis  quoque  et  sanctitas  conspicua  est.  Porro  non  in  alium  scopum  destinatur,  quae  in  scripturis  nobis  proponitur  Dei  notitia,  quam  quae  in  creaturis  impressa  nitet.  Nempe  ad  Dei  timorem  primum,  deinde  ad  fiduciam  nos  invitat:  quo  scilicet  et  perfecta  vitae  innocentia  et  non  simulata  obedientia  colere  illum  discamus;  tum  ab  eius  bonitate  toti  dependere.  Verum,  quia  se  Dominus  propinquiore  intuitu  contemplandum  non  exhibet,  quam  in  facie  Christi  sui,  quae  ipsa  fidei  tantum  oculis  conspicitur:  quod  de  notitia  Dei  dicendum  restat,  in  eum  locum  melius  differetur,  quo  tractabitur  fidei  intelligentia.