9:303  303  RESPONSIO  ALTERA  304  agendi  ratione  minime  fuisse  varium.  Hoc  posito,  tecum  nunc  digladiare  ut  libet:  Si  Deus  facere  vetat  quod  vult,  aut  iubet  quod  non  vult,  eum  praecipere  ut  eius  voluntati  resistatur.  Nihil  enim  in  istis  sordibus  meum  esse  agnosco.  Quin  potius  haec  doctrinae  meae  summa  est,  quae  in  lege  expressa  est  Dei  voluntas,  clare  monstrare  rectitudinem  ei  probari,  iniquitatem  ei  odio  esse.  Et  certe  maleficiis  non  denunciaret  poenam,  si  placerent  :  sed  nihil  obstat  quominus  inenarrabili  suo  consilio  quae  fieri  non  vult  et  facere  vetat,  fieri  velit  in  diversum  finem.  Hic  si  mihi  obiicias  [pag.  77]  secum  Deum  pugnare:  quaeram  vicissim  an  tuum  sit  legem  ei  praescribere,  ne  iudicii  tui  captum  excedat.  Clamat  Moses  sua  Deo  arcana  esse:  in  lege  vero  patefactum  esse  hominibus  quod  utile  cognitu  est  (Deut.  29,  29).  Tu  nihil  nisi  quod  tibi  explicite  patet,  Deo  non  licere  putabis?  Postquam  in  libro  Iob  celebrata  est  consilii  altitudo  quae  absorbet  omnes  humanos  sensus,  tandem  additur  clausula:  En  istae  sunt  extremitates  viarum  eius,  et  quantulum  quod  auditur  in  eo  (Iob  26,  14)?  Tu  aliud  Deo  consilium  non  permittis,  nisi  quod  oculis  tuis  subiicitur.  Iam  aut  plus  quam  caecus  es,  aut  vides,  quum  te  ab  adulterio  prohibet  voco  sua  Deus,  nolle  te  esse  adulterum:  et  tamen  in  adulteriis  quae  damnat,  iusta  iudicia  exercere  :  quod  certe  nisi  sciens  et  volens  non  faceret.  Si  brevius  perstringi  cupis,  adulterium  fieri  non  vult,  quatenus  pollutio  est  violatio  sancti  ordinis,  legis  [pag.  78]  denique  transgressio:  quatenus  tam  adulteriis,  quam  aliis  maleficiis  utitur  ad  exsequendas  suas  vindictas,  certe  non  invitus  fungitur  iudicis  officio.  Quod  enim  crudeliter  tam  Chaldaei  quam  Assyrii  per  horrendas  caedes  grassati  sunt,  hoc  in  ipsis  non  laudabimus:  imo  Deus  se  vindicem  fore  pronunciat,  qui  tamen  rursus  alibi  praedicat  sacrificia  sibi  hoc  modo  parari.  Tu  velle  Deum  negabis,  quod  honorifico  sacrificii  nomine  dignatur?  Tandem  igitur  expergiscere,  et  agnoscas  ubi  homines  prava  cupiditate  praecipites  aguntur,  Deum  occultis  et  inenarrabilibus  modis  iudicia  sua  moderari.  Subtilis  tibi  videtur  captio,  dum  quaeris,  ex  quo  Deus  adulterium  committere  vetuit,  velitne  omnes  esse  adulteros,  an  partem.  Nam  si  de  parte  respondeo,  infers  Deum  sibi  esse  contrarium.  Atqui  iam  certum  responsum  tenes,  Deum  ab  omnibus  [pag.  79]  exigere  castitatem,  quia  eam  in  omnibus  amat:  diversas  tamen  volendi  rationes  ipsa  experientia,  me  tacente,  ostendit.  Nam  si  aeque  efficaciter  vellet  omnes  esse  castos,  haud  dubie  castos  omnes  redderet.  Nunc  quum  singulare  eius  donum  sit  castitas,  colligere  promptum  est,  aliter  velle  quod  verbo  praecipit,  quam  quod  spiritu  regenerationis  implet.  Hac  ratione  non  est  cur  impudica  tua  lingua  hypocrism  Deo  exprobres,  ac  si  mel  in  ore  haberet,  fel  autem  in  corde.  Neque  enim  quidquam