5:303  EPISTOLA  II.  gari  annorum  praescriptionem:  verum  si  huiusce  rei  cognitio  ad  bonos  viros  deferatur,  qui  iustum  potius  et  aequum,  quam  annorum  numerum  expendant,  quo  titulo,  amabo,  vestram  possessionem  defendetis?  Fingamus  vero  apud  Dei  tribunal  hanc  causam  agitari,  quando  et  ad  illius  cognitionem  proprie  pertinet,  nec  inter  homines  melior  reperiri  potest  aut  iustior  arbiter.  Facultates,  quantum  intelligo,  quadrifariam  partitas  habetis.  Nam  partim  decimis,  partim  annuis  aut  agrorum  aut  vectigalium  pensionibus,  partim  blandis  captionibus  (quas  vos  extraordinarias  oblationes),  partim  violentis  exactionibus  (quas  spiritualia  iura  nuncupatis)  constant.  Decimas  quia  lex  mosaica  Levitis  attribuebat,  ad  vos  (leviticum  scilicet  genus)  optima  ratione  nunc  esse  translatas  dicitis.  De  his  ergo  primo  loco  disserendum.  Quanquam  supervacuum,  ac  prope  ridiculum  arbitror,  anxiam  de  iure  decimarum  tecum  disputationem  instituere,  qui  non  ignoras  successionem  istam  cupidorum  hominum  calliditate,  vafre  quidem,  sed  nulla  probabili  causa  excogitatam.  Nam  quod  ex  apostolo  (Hebr.  7,  12)  citant,  translato  sacerdotio,  legis  translationem  necessario  sequutam,  id  quam  infirmum  sit  et  evanidum,  ostendere  piget.  Ad  Christum  sane  transiit  Aaronis  sacerdotium,  cuius  beneficio  non  certus  rasorum  numerus,  sed  universa  sine  exceptione  fidelium  natio  in  regale  sacerdotium  assumpta  fuit.  Quid  hoc  ad  nescio  quos  pseudolevitas?  quibus  ne  postrema  quidem  subsellia  in  Dei  populo  concedimus.  Quod  si  in  Levitarum  vices  subierunt,  eadem  qua  ipsi  fuerunt  conditione:  cur  praeter  decimas  tot  possessiones  absorbere,  tantam  undique  rerum  varietatem  corradere  sibi  permittunt?  Ea  enim  lege  huiusmodi  portio  Levitis  assignabatur,  ne  pedem  terrae  praeter  domicilium  possiderent  (Ios.  14,  3  et  alibi).  Cur  vini  usum  tam  benigne  ac  liberaliter  sibi  indulgent,  quod  Levitis  gustare  non  licebat?  Facessant  ergo  nugae  istae:  quas  tametsi  refutatione  indignas  ducebam,  quia  tamen  video  imperitis  fumos  offundere,  verbo  uno  [pag.  7  ll  attingere  necesse  habui.  Equidem  si  quibus  ordo  iste  approbetur,  ut  quemadmodum  apud  Israelitas  decimis  alebantur  Levitae,  ita  in  populo  etiam  christiano  decimae  colligantur,  quae  in  alimenta  pastorum  conferantur,  et  pauperum,  nihil  reclamo:  quin  potius  eorum  sententiae  meum  quoque  calculum  addo;  quandoquidem  alicunde  certe  desumi,  quod  ad  sustentandos  ecclesiarum  ministros  impendatur,  necesse  est.  Nec  expedire  mihi  videtur,  quod  aequissime  constitutum  fuerit,  sine  causa  innovari:  modo  ne  ius  illud  leviticum  falso  praetendatur,  et  ecclesiastici  pastoris  stipendium,  non  decimarum  fertilitate,  sed  apostoli  praescripto  definiatur,  ut  sit  necessariis  vitae  subsidiis  contentus.  Caeterum  quum  in  hos  usus  destinantur  decimae,  simul  arcentur,  velut  positis  repagulis,  omnes  isti  pigri  ventres,  qui  se  illis  nunc