47:303  303  IN  EVANGELIUM  IOANNIS  304  est  eorum  impietas,  qui  veluti  ex  animi  proposito  Deum  reiiciunt.  Iudicium  enim  de  his  ferre  supersedet,  quia  potius  venerit  in  omnium  salutem.  Primo  loco  tenendum  est,  ipsum  hic  non  de  quibuslibet  incredulis  loqui,  sed  qui*  scientes  et  volentes  doctrinam  evangelii  sibi  monstratam  reiiciunt.  Cur  ergo  damnare  eos  Christus  non  vult?  Nempe  hic  deposita  ad  tempus  iudicis  persona,  quo  plus  animi  omnes  habeant  ad  resipiscentiam,  salutem  promiscue  omnibus  offert  et  brachia  sua  ad  omnes  amplexandos  extendit.  Quanquam  interea  crimen  non  levi  circumstantia  amplificat,  si  tam  benignam  et  suavem  invitationem  repudient:  perinde  enim  est  ac  si  dixisset:  Ecce  ego  adsto  ad  omnes  vocandos,  et  oblitus  personae  iudicis  hoc  unum  habeo  propositum,  ut  alliciam  omnes,  et  qui  iam  bis  perditi  videntur,  ab  interitu  eripiam.  Nemo  igitur  ob  evangelii  contemptum  damnatur,  nisi  qui  amabile  salutis  nuntium  adspernatus  ultro  sibi  exitium  accersere  voluit.  Iudicandi  verbum,  ut  patet  ex  antitheto  servare,  pro  damnare  hic  accipitur.  Hoc  autem  ad  proprium  et  genuinum  Christi  munus  referri  debet.  Nam  quod  evangelii  causa  gravius  damnantur  increduli,  accidentale  est,  non  ex  eius  natura,  ut  aliquoties  diximus.  48.  Qui  reiicit  me.  Ne  sibi  indulgeant  impii,  quasi  impune  adversus  Christum  lasciviant,  hic  horrendam  denuntiationem  addit,  quod,  etiamsi  quiescat  ipse,  sola  tamen  doctrina  sufficiat  ad  eos  damnandos,  quemadmodum  alibi  alio  iudice  opus  fore  negat  (supra  5,  45)  quam  Mose,  in  quo  gloriabantur.  Sensus  est  igitur:  Ego  quidem  ingenti  salutis  vestrae  desiderio  flagrans,  iure  meo  abstineo  in  vobis  damnandis,  et  totus  ad  servandum  incumbo  quod  periit:  sed  non  propterea  putetis  vos  e  manu  Dei  elapsos:  nam  ut  maxime  taceam,  solus  sermo,  qui  a  vobis  contemptus  fuerit,  idoneus  est  iudex.  Et  non  accipit  verba.  Posterius  membrum  exegesis  est  prioris.  Quia  enim  ingenita  est  hominibus  hypocrisis,  nihil  illis  facilius  est  quam  verbo  tenus  iactare  se  paratos  esse  ad  recipiendum  Christum,  et  videmus  quam  vulgaris  sit  etiam  inter  pessimos  quosque  haec  iactantia.  Quare  tenenda  est  ista  definitio,  Christum  reiici,  ubi  non  amplectimur  puram  evangelii  doctrinam.  Papistae  pleno  quidem  ore  Christi  nomen  personant:  simul  atque  profertur  sincera  eius  veritas,  nihil  illis  odiosius.  Tales  non  secus  ac  Iudas  Christum  osculantur.  Ideo  discamus  eum  in  verbo  suo  includere,  et  illi  praestare,  quem  unice  exigit,  obedientiae  cultum.  Sermo  quem  loquor.  Non  potuit  magis  splendido  elogio  extolli  evangelii  autoritas,  quam  dum  illi  iudicii  potestas  defertur.  Nam  secundum  haec  verba  nihil  aliud  erit  extremum  iudicium,  quam  evangelicae  doctrinae  approbatio.  Conscendet  quidem  ipse  Christus  tribunal,  sed  sententiam  ex  verbo,