1:303  INSTITUTIO  REL.  CHRIST.  1536  .  1554.  Filios  certe  Dei  longe  alia  decet  sobrietas:  qui  ut  omni  veritatis  luce,  sine  Dei  spiritu,  orbatos  se  vident,  ita  non  ignorant,  verbum  esse  organum  quo  spiritus  sui  illuminationem  fidelibus  Dominus  dispensat.  Alium  enim  spiritum  nesciunt,  quam  qui  in  apostolis  habitavit  et  loquutus  est;  cuius  oraculis  assidue  ad  verbi  audientiam  revocantur.  37.  Sed  enim  quoniam  Dei  notitiam,  quae  in  mundi  machina,  universisque  creaturis  non  obscure  alioqui  proponitur,  familiarius  tamen  etiamnum  et  clarius  verbo  docuimus  explicari,  iam  operae  pretium  est  expendere,  ecquid  se  talem  Dominus  in  scriptura  nobis  repraesentet,  qualem  in  operibus  suis  delineari  prius  visum  est.  Longa  certe  materia,  si  quis  in  ea  diligentius  tractanda  immorari  velit.  At  ego  velut  indicem  proposuisse  contentus  ero,  quo  monitae  piae  mentes,  quid  potissimum  in  scripturis  de  Deo  investigandum  sit,  norint,  et  ad  certum  eius  inquisitionis  scopum  dirigantur.  Initio  ergo  Dominus  eum  esse  se  Deum  declarat,  qui  postquam  coelum  et  terram  creavit,  universum  hominum  genus  immensa  beneficentia  complexus  ac  prosequutus  quidem  fuerit;  sed  peculiari  gratia  pios  semper  ac  perpetua  serie  aluerit,  sustentant,  servarit,  atque  ab  illis  vicissim  agnitus  fuerit,  ac  religiose  cultus.  Tum  historiis  omnium  saeculorum  quasi  typis  quibusdam  ob  oculos  ponit,  quanta  sit  bonitatis  suae  erga  fideles  constantia,  quanta  providentiae  sedulitas,  quanta  beneficentiae  promptitudo,  quanta  auxilii  virtus,  quantus  dilectionis  ardor,  quam  indefessa  in  ignoscendis  delictis  patientia,  quam  paterna  in  puniendis  castigatio,  quam  perpetuus  veritatis  tenor;  rursum,  quanta  in  peccatores  ultionis  severitas,  quam  horrenda,  post  longam  tolerantiam,  irae  suae  inflammatio,  quanta  manus  suae,  ad  eos  prosternendos  proterendosque  potentia.  Hactenus  pulchre  convenit  ista  Dei  effigies  cum  illa  quam  in  mundi  universitate  apparere  nuper  ostendimus.  38.  Certis  tamen  locis  dilucidae  eius  descriptiones  nobis  proponuntur,  quibus  εἰϰονιϰῶς  visenda  exhibetur  germana  eius  facies;  unde  melius  perspicietur  ista  convenientia.  Nam  quum  eam  describeret  Moses,  videtur  sane  voluisse  breviter  comprehendere,  quidquid  de  ipso  intelligi  ab  hominibus  fas  esset.  Iehovah,  inquit  (Exod.  34,  6),  Iehovah,  Deus  misericors  et  clemens,  patiens,  et  multae  miserationis,  ac  verax,  qui  custodis  misericordiam  in  millia,  qui  aufers  iniquitatem  et  scelera,  apud  quem  innocens  non  erit  innocens,  qui  reddis  iniquitatem  patrum  filiis  ac  nepotibus.  Ubi  animadvertamus  eius  aeternitatem  καὶ  αὐτουσίαν,  magnifico  illo  nomine  bis  re-