55:302  sermonem  proferre  coepit,  vis  illa,  quae  prius  abscondita  latebat,  sese  in  creaturas  diffudit.  Iam  haec  aliqua  fuit  manifestatio:  sed  apostolus  alio  respicit,  nempe  quod  tunc  demum  manifestata  fuerit  vita  in  Christo,  quum  ipse  carne  nostra  indutus  partes  redemptionis  implevit.  Tametsi  enim  eiusdem  vitae  patres,  etiam  sub  lege,  socii  ac  consortes  fuerunt:  scimus  tamen  sub  spe,  quae  revelanda  erat,  fuisse  conclusos.  Necesse  illis  erat,  vitam  a  morte  et  resurrectione  Christi  petere  :  atqui  res  erat  non  solum  procul  remora  ab  oculis,  sed  mentibus  etiam  abscondita:  pendebant  igitur  a  spe  revelationis,  quae  suo  demum  tempore  subsequuta  est.  Non  poterant  quidem  vitam  obtinere,  nisi  sibi  aliquo  modo  manifestatam:  sed  inter  nos  et  illos  magnum  est  discrimen:  quia  quem  ipsi  obscure  sibi  promissum  in  figuris  quaerebant,  nos  iam  exhibitum  quasi  manibus  tenemus.  Caeterum  consilium  apostoli  est,  tollere  opinionem  novitatis,  quae  minuere  evangelii  dignitatem  poterat.  Qua  ratione  dicit,  non  coepisse  nunc  demum  vitam,  utcunque  nuper  apparuerit:  quia  perpetuo  fuit  apud  patrem.  3.  Quod  vidimus  et  audivimus,  annuntiamus  vobis:  ut  et  vos  societatem  habeatis  nobiscum,  et  societas  nostra  sit  cum  patre  et  cum  filio  eius  Iesu  Christo.  4.  Et  haec  scribimus  vobis,  ut  gaudium  vestrum  sit  completum.  5.  Et  haec  est  promissio  quam  annuntiamus  vobis,  quod  Deus  lux  est,  et  tenebrae  in  eo  non  sunt  ullae.  6.  Si  dixerimus  quod  societatem  habemus  cum  eo,  et  in  tenebris  ambulamus,  mentimur  et  veritatem  non  facimus.  7.  Si  autem  in  luce  ambulamus,  sicut  ipse  in  luce  est,  societatem  habemus  inter  nos  mutuam  :  et  sanguis  Iesu  Christi  filii  eius  emundat  nos  ab  omni  peccato.  3.  Quod  vidimus.  Iam  tertio  repetit  illud  suum  vidisse  et  audisse,  ne  quid  desit  ad  solidam  suae  doctrinae  certitudinem.  Atque  id  diligenter  notandum  est,  delectos  esse  a  Christo  evangelii  praecones,  qui  idonei  ac  fidi  eorum  omnium,  quae  dicturi  erant,  testes  esse  possent.  Simul  etiam  de  animi  sui  affectu  testatur:  quia  non  alia  ratione  moveri  se  dicit  ad  scribendum,  nisi  ut  eos,  quibus  scribit,  ad  societatem  inaestimabilis  boni  invitet.  Unde  patet  quantam  habeat  salutis  ipsorum  curam.  Quod  ad  conciliandam  fidem  non  parum  valet:  nimis  enim  ingrati  sumus,  si  eum  recusamus  audire,  qui  felicitatis,  quam  adeptus  est,  partem  communicare  nobiscum  optat.  Fructum  deinde  exprimit  qui  ex  evangelio  percipitur:  nempe  ut  coniuncti  simus  Deo  et  filio  eius  Christo  :  in  quo  summum  bonum  consistit.  Hoc  secundum  membrum  addi  oportuit,  non  modo  ut  pretiosam  et  amabilem  redderet  evangelii  doctrinam,  sed  etiam  ut  ostenderet,  non  in  alium  finem  eos  sibi  cupere  socios,  nisi  ut  Deo  adduceret,  atque