5:302  ditie  abluimur  omnes,  conspuitur,  si  tota  redemptio  morte  eius  acquisita  dissipatur,  si  coena,  qua  nobis  mortis  suae  memoriam  commendavit,  profanatur,  si  Dei  maiestas  erecto  in  eius  locum  idolo  deiicitur:  viderint  qui  faciendis  missis  sumptus  suppeditant,  qua  satis  speciosa  ratione  purgare  se  possint,  quo  minus  istorum  omnium  rei  agantur,  quibus  occasionem  scientes  ac  volentes  praebent.  Si  denique  nullum  a  missa  blasphemiae  genus  abest,  quo  Dei  Christique  gloria  possit  obscurari,  viderint  quoties  sacrificulum  ad  altare  mittunt,  an  non  triumphum  apparent,  quo  totum  Christi  regnum  a  Satana  traducatur?  In  hunc  modum  si  Christum  cum  sua  cruce  ludibrio  habere,  et  prostituere  homini  christiano  nefas  non  est,  nihil  erit  quod  non  liceat.  Imo  vero  mille  potius  mortes  oppetendae,  quam  tale  probrum  sacrosancto  Christi  nomini,  nostra  culpa,  aliquando  inuratur.  Quis  enim  eo  intercessore  confidant,  quem  suo  sacerdotio,  hoc  est  intercedendi  munere,  quotidie  spoliet?  Quis  aeternam  sui  sanctificationem  reponat  in  unica  1)  Christi  oblatione,  quam  suppositis  aliis  assidue  inducit  ac  obliterat?  Quis  suarum  sordium  ablutionem  speret  a  Christi  sanguine,  quem  porcis  conculcandum  proiicit?  Quis  spem  beatae  vitae  ex  Christi  morte  concipiat,  cuius  fructum  alio  ut  transferat,  eam  tota  sua  virtute  enervat?  Quis  se  Christi  participatione,  extra  quam  non  nisi  mors  est,  vivere  cogitet,  qui  sacram  eius  communicationis  tesseram  disrumpit?  Quam  conscientiae  securitatem  ad  Dei  tribunal  afferat  ille,  qui  eius  gloriam,  quam  illibatam  sibi  uni  servari  poscit,  ad  idolum  traductam  procuret?  Atqui  in  eo  corde,  cui  sint  illa  omnia  ablata,  quae  vel  fidei  vel  pietatis  scintilla  restare  potest?  Illas  praeterea  satisfactiones  dum  mercantur,  quibus  a  cruciatu  solvantur  mortuorum  animae,  mirum  nisi  probe  intelligunt,  quam  flagitiosa  in  Christum  perfidia  sese  obstringant.  Quotquot  enim  animarum  salutem  pretio  nundinantur,  eos  veram  illam  ac  unicam,  quae  non  auro  aut  argento,  sed  pretioso  Christi  sanguine  constitit,  redemptionem  abnegare,  certo  certius  est.  Iam  neminem  fore  existimo,  cui  quidem  in  aliqua  frontis  [pag.  70]  particula  pudor  haereat,  qui  conscientiae  innocentiam  in  tenendis  profanis  illis  sacerdotiis  testari  ausit:  quorum  quae  purissima  videntur,  tantum  exsecrabilis  nequitiae  secum  trahunt.  Nunc  ad  te,  o  vir  eximie,  aliosque  in  universum  omnes,  qui  in  papae  regno  locum  aliquem  beneficii  nomine  obtinent,  orationem  meam  refero.  Quidquid  proventus  annuatim  inde  ad  vos  redit,  qua  conscientia  usurpare  audeatis,  quaero.  Si  in  cancellis  vestratium  iudiciorum  haec  disputatio  versaretur,  scio  ad  obtinendum  satis  superque  esse,  alle-  1)  una,  1576  seqq.