25:302  non  steterat  quominus  scelesta  impietate  se  pessumdaret  populus  Israel.  EIUSDEM  HISTORIAE  REPETITIO.  EX  DEUT.  CAP.  IV.  3.  Oculi  vestri  viderunt  quae  fecit  Iehova  propter  Baal-Peor,  omnem  enim  hominem  qui  perrexerat  post  Baal-Peor  perdidit  Iehova  Deus  tuus  e  medio  tui.  4.  Vos  autem  qui  adhaesistis  Iehovae  Deo  vestro  vivitis  universi  hodie.  3.  Oculi  vestri.  Certius  testatur  haec  expositio,  adeo  conspicuum  fuisse  poenae  exemplum,  ut  ne  rudissimos  quidem  lateret:  compellat  enim  Moses  non  qui  pollerent  iudicio,  sed  quoslibet  e  vulgo,  qui  tantum  spectatores  fuerant.  Certe  si  obscurior  fuisset  Dei  vindicta,  non  tam  confidenter  eos  citasset  testes:  quo  minus  excusabilis  fuit  eorum  socordia,  si  in  re  tam  clara  et  probe  cognita  caecutirent.  Porro  quod  eorum  constantiam  laudat,  restringo  ad  actum  praesentem:  quia  satis  patet  non  continuo  tenore  eos  adhaesisse  Deo.  Sensus  est,  in  illa  Dei  ultione  manifestum  fuisse  discrimen,  ut  mors  impiae  multitudinis  apud  superstites  assereret  purum  eius  cultum.  NUMER.  CAP.  XXVI.  1.  Et  fuit,  post  plagam  loquutus  est  Iehova  ad  Mosen  et  Eleazar  filium  Aharon  sacerdotis,  dicendo:  2.  Tollite  summam  universae  congregationis  filiorum  Israel,  a  filio  viginti  annorum,  et  supra,  per  domum  patrum  suorum,  omnium  egredientium  ad  bellum  in  Israele.  3.  Itaque  loquutus  est  Moses  et  Eleazar  sacerdos  cum  illis  in  campestribus  Moab,  iuxta  Iordanem  Iericho,  dicendo:  4.  Numerate  universam  congregationem  filiorum  Israel,  a  filio  viginti  annorum  et  supra:  quemadmodum  praeceperat  Iehova  Mosi  et  filiis  Israel  qui  egressi  erant  e  terra  Aegypti.  5.  Reuben  fuit  primogenitus  Israelis,  filii  Reuben  fuerunt  aliquot  :  de  Henoc  fuit  familia  Henochitarum:  de  Phallu  familia  Phalluitarum.  6.  De  Hesron,  familia  Hesronitarum:  de  Charmi  familia  Charmitarum.  7.  Istae  sunt  familiae  Reubenitarum:  et  fuerunt  numerati  eorum  tria  et  quadraginta  millia  septingenti  et  triginta.  8.  Et  ex  filiis  Phallu  Eliab.  9.  Filii  autem  Eliab,  Nebuel,  Dathan  et  Abiron:  isti  sunt  Dathan  et  Abiron  maiores  synagogae  qui  rixati  sunt  contra  Mosen  et