1:302  ne  sub  titulo  suo  satanae  spiritus  obrepat,  in  sua  imagine,  quam  scripturis  impressit,  vult  a  nobis  recognosci.  Scripturarum  autor  est;  varius  dissimilisque  sibi  1)  esse  non  potest.  Qualem  igitur  se  illic  semel  prodidit,  talis  perpetuo  maneat  oportet.  Hoc  contumeliosum  illi  non  est:  nisi  forte  honorificum  ducamus  a  se  ipso  desciscere  et  degenerare.  36.  Quod  vero  literae  occidenti  nos  incubare  cavillantur,  in  eo  poenas  luunt  contemptae  scripturae.  Satis  enim  constat,  Paulum  illic  (2  Cor.  3,  6)  adversus  pseudoapostolos  contendere,  qui  quidem  legem  citra  Christum  commendantes,  a  novi  testamenti  beneficio  populum  avocabant:  quo  paciscitur  Dominus,  se  legem  suam  in  fidelium  viscera  insculpturum,  et  cordibus  inscripturum  (Ier.  31,  31).  Emortua  est  igitur  litera,  et  suos  lectores  necat  lex  Domini,  ubi  et  a  Christi  gratia  divellitur  et  intacto  corde  auribus  tantum  insonat.  Verum  si  per  spiritum  efficaciter  cordibus  imprimitur,  si  Christum  exhibet,  verbum  est  vitae,  convertens  animas,  sapientiam  praestans  parvulis,  etc.  Quin  etiam  eodem  loco  (v.  8)  praedicationem  suam  apostolus,  ministerium  spiritus  vocat.  Nimirum  significans,  ita  suae,  quam  in  scripturis  expressit,  veritati  inhaerere  spiritum  sanctum,  ut  vim  tum  demum  suam  proferat  atque  exserat,  ubi  sua  constat  verbo  reverentia  ac  dignitas.  Nec  his  repugnat,  quod  nuper  dictum  est:  verbum  ipsum  non  valde  certum  nobis  esse,  nisi  spiritus  testimonio  confirmetur.  Mutuo  enim  quodam  nexu  Dominus  verbi  spiritusque  sui  certitudinem  inter  se  copulavit,  ut  solida  verbi  religio  animis  nostris  insidat,  ubi  affulget  spiritus,  qui  nos  illic  Dei  faciem  contemplari  faciat;  ut  vicissim  nullo  hallucinationis  timore  spiritum  amplexemur,  ubi  illum  in  sua  imagine,  hoc  est,  in  verbo,  recognoscimus.  Ita  est  sane.  Non  verbum  hominibus  communicavit  Deus,  quod  spiritus  sui  adventu  extemplo  aboleret;  sed  eundem  spiritum,  cuius  virtute  verbum  administraverat,  submisit,  qui  suum  opus  efficaci  verbi  confirmatione  absolveret.  In  hunc  modum  Christus  discipulis  duobus  sensum  aperiebat  (Luc.  24,  27):  non  ut  abiectis  scripturis  per  se  saperent;  sed  ut  scripturas  intelligerent.  Similiter  Paulus,  dum  hortatur  Thessalonicenses  ne  spiritum  exstinguant  (1  Thess.  5,  19.  20),  non  sublimiter  eos  arripit  ad  inanes  sine  verbo  speculationes;  sed  continuo  subiicit,  non  spernendas  prophetias.  Quo  procul  dubio  innuitur,  spiritus  lucem  praefocari,  simul  atque  in  contemptum  veniunt  prophetiae.  Quid  ad  haec  tumidi  isti  Ἐνθουσιασταὶ,  qui  hanc  unam  reputant  eximiam  illuminationem,  ubi,  secure  omisso,  ac  valere  iusso  Dei  verbo,  quidquid  stertendo  conceperint,  non  minus  confidenter  quam  temere  arripiunt?