6:300  naturam?  sed  in  recte  faciendo  nullum  est  vinculum  necessitatis:  quia  libertas  est  caritatis.  Nunc  ad  sententiam  apostolicam  redi:  caritas  Dei  diffusa  est  in  cordibus  nostris,  per  spiritum  sanctum,  qui  datus  est  nobis  (Rom.  5,  5).  A  quo  autem?  nisi  ab  illo  qui  ascendit  in  altum,  captivam  duxit  captivitatem?  Quod  autem  ex  vitiis  naturae,  non  autem  ex  conditione,  sit  peccandi  necessitas,  audiat  homo;  atque  ut  in  eadem  non  sit,  discat  Deo  dicere:  De  necessitatibus  meis  erue  me.  [pag.  94]  Nec  aliam  responsionem  postulat  locus  de  Quantitate  animae.  Nam  si  Augustino  creditur,  ubicunque  liberi  arbitrii  commendat  facultatem,  ad  primam  naturae  conditionem,  non  praesentem  miseriam,  in  quam  arbitrii  vitio  praecipitata  est,  respicit.  Si  non  creditur,  saltem  retractat  quod  dixerat.  Quum  tam  validis  machinis  in  nos  proruat,  miraris  lector,  si  stupore  exanimetur,  dum  videt  nos  nihil  commoveri?  Ego  vero  miror,  tam  flatuosum  hominem  non  protinus  medium  crepare.  Verum  progredi  nos  oportet.  Libro  vicesimo  secundo  adversus  Faustum  Manichaeum,  sic  creatum  esse  hominem  dicit,  ut  ei  inesset  fraenandi  cupiditates  possibilitas  aut  facultas.  Hoc  nihil  inter  nos  controversiae  habet.  De  prima  enim  creatione  agitur.  At  postea  subiungit,  quod  non  nisi  de  praesenti  statu  possit  intelligi:  Per  eam  possibilitatem  instaurari  hominem,  per  quam,  si  voluisset,  non  cecidisset.  Possibilitas,  inquit  Pighius,  liberi  arbitrii  facultas  est.  Per  eam  resurgere  hominem  testatur  Augustinus.  Absit  vero  a  sancto  viro  impium  hoc  deliramentum,  quod  toties  abominatur,  et  quod  omnes  africani  episcopi,  eo  autore,  dignum  anathemate  censuerunt.  Quid  igitur  his  verbis  significat?  Nihil  sane  aliud,  nisi  nos  ex  peccati  servitute  in  eam  libertatem  restitui,  Dei  beneficio,  qua  mundum  et  carnem  omnesque  concupiscentias  vincamus.  Haec  enim  nostra  est  possibilitas,  quam  ubique  commendat,  ut  Domini  virtute  fortes  simus.  At  cur  id  nominatim  eo  loco  non  expressit?  Respondet  ipse:  1)  Naturam  contra  Manichaeos  potius  quam  gratiam  nomino,  quia  de  natura  cum  illis  quaestio  erat:  et  utique  id  agit  gratia,  ut  sanata  natura  possit,  quod  vitiata  non  potest.  Fatetur  se  naturae  tribuere,  quod  non  nisi  gratiae  est:  quia  scilicet  non  alius  sit  gratiae  finis,  nisi  ut  collapsam  et  eversam  naturam  restituat  et  erigat.  Quae  ex  secundo  contra  Felicem  libro  deinde  recitat  Pighius,  longe  minus  habent  coloris.  Nihil  enim  quam  de  naturae  integritate  illic  [pag.  95]  tractatur.  Et  tamen  quod  nihil  de  captivae  naturae  liberatione  et  perditae  reparatione  illic  dixerit,  in  Retractationibus  excusat  Augustinus  ipse:  quia  hoc  causa  non  1)  Retract,  lib.  1.  cap.  16.