52:300  deret:  corporalibus  vero  exercitiis  dandam  eatenus  operam,  ne  pietatis  studium  impediant  vel  morentur.  Quae  promissiones  habeat  Summa  consolatio,  quod  Deus  nusquam  deesse  piis  velit.  Nam  ut  perfectionem  nostram  in  pietate  statuerat,  ita  nunc  eam  facit  verae  felicitatis  complementum.  Quia  autem  initium  felicitatis  est  in  hac  vita,  ideo  ad  hanc  quoque  extendit  promissiones  divinae  gratiae,  quae  solae  nos  efficiunt  beatos,  et  sine  quibus  sumus  miserrimi.  Nam  Deus  in  hac  quoque  vita  se  nobis  fore  patrem  testatur.  Verum  meminerimus,  inter  bona  vitae  praesentis  et  futurae  discernere.  Nam  eatenus  nobis  benefacit  Deus  in  hoc  mundo,  ut  gustum  duntaxat  suae  bonitatis  praebeat  :  et  tali  gustu  nos  alliciat  ad  coelestium  bonorum  desiderium,  ut  in  illis  acquiescamus.  Ita  fit  ut  bona  praesentis  vitae  non  modo  permista  sint  plurimis  aerumnis,  sed  quasi  obruta.  Neque  enim  nobis  expedit  hic  abundare,  ne  luxuriemur.  Porro  ne  quis  operum  merita  hinc  efferat,  tenendumfest  quod  iam  diximus,  pietatem  non  modo  bonam  conscientiam  erga  homines  ac  Dei  timorem,  sed  fidem  quoque  et  invocationem  complecti.  9.  Fidelis  sermo.  Nunc  in  sententiae  clausula  ponit  quod  ante  initio  bis  praefatus  est:  idque  consulto  facere  videtur,  quia  mox  contrariam  obiectionem  subnectet.  Caeterum  non  abs  re  tanta  asseveratione  utitur.  Est  enim  paradoxum  valde  pugnans  cum  sensu  carnis,  Deum  suis  in  hoc  mundo  suppeditare  quae  ad  beate  et  feliciter  vivendum  pertinent:  quum  saepenumero  destituti  sint  bonis  omnibus,  ideoque  putentur  a  Deo  abiecti.  Ergo  non  contentus  simplici  doctrina,  hoc  veluti  clypeo  contrarias  omnes  tentationes  propulsat  :  atque  hoc  modo  fideles  admonet,  ut  ianuam  aperiant  Dei  gratiae  quam  infidelitas  nostra  praecludit.  Nam  certe  si  beneficiorum  Dei  essemus  capaces,  liberalius  nobiscum  ageret  10.  Nam  in  hoc  laboramus.  Anticipatio  est  qua  solvit  illam  quaestionem,  fideles,  quia  premantur  omne  genus  aerumnis,  omnium  esse  miserrimos.  Ergo  ut  ostendat  non  debere  ab  externa  specie  aestimari  eorum  conditionem,  separat  eos  a  reliquis:  primum  in  causa,  deinde  in  exitu.  Unde  sequitur,  nihil  illis  decedere  ex  promissionibus  quas  dixit,  quum  rebus  adversis  vexantur.  Summa  est,  non  esse  miseros  fideles  in  afflictionibus,  quia  bona  conscientia  eos  sustentat,  et  prosper  laetusque  exitus  eos  manet.  Quia  autem  felicitas  vitae  praesentis  duobus  potissimum  membris  constat,  honore  et  commoditatibus:  ponit  duo  contraria,  labores  et  probrum:  priore  vocabulo  significans  incommoda  quaevis  et  molestias:  ut  sunt  paupertas,  frigus,  nuditas,  fames,  exilia,  spoliationes,  vincula,  verbera,  et  aliae  persequutiones.  Consolatio  haec,  spem  fixam  habemus  in  Deo  vivente,  ad  causam  refertur.  Nam  adeo  non  sumus  miseri  quum  patimur  propter