50:300  faloit  pas  aussi  qu'il  leur  escrivist,  sinon  pour  les  attirer,  pour  les  gaigner,  et  les  ramener  au  bon  chemin.  Puis  qu'ainsi  est  donc  que  sainct  Paul  procure  que  les  Galatiens  soyent  reduits  (comme  il  estoit  requis)  au  chemin  de  salut,  voila  pourquoy  il  les  associe  a  ce  bien  inestimable  qui  nous  a  este  acquis  par  le  Fils  de  Dieu,  et  qu'il  les  tient  encores  comme  separez  de  ce  monde,  et  les  unit  a  la  compagnie  de  ceux  que  Dieu  accepte  et  advoue  pour  ses  enfans.  Or  cela  est,  pour  ce  qu'il  y  avoit  encores  quelque  semence  de  l'Evangile  combien  qu'ils  eussent  la  este  em  brouillez  en  quelques  erreurs,  tant  y  a  qu'ils  n'avoyent  pas  pleinement  abandonne  Dieu,  et  ne  s'estoyent  pas  alienez  de  l'Evangile.  Sainct  Paul  donc  les  retient,  et  les  met  encores  au  reng  des  fideles  pour  ceste  raison.  Et  ainsi  Dieu  nous  tiendra  comme  ses  domestiques,  combien  que  nous  n'en  soyons  pas  dignes,  a  cause  de  sa  Parole  qui  nous  est  preschee.  Vray  est  que  ce  nous  sera  tant  plus  grieve  condamnation,  quand  Dieu  nous  aura  appelez,  et  que  nous  n'aurons  point  respondu:  mais  cependant  quand  nous  aurons  quelque  bonne  affection  de  venir  a  luy,  encores  qu'il  y  ait  beaucoup  de  vices  et  d'infirmitez,  si  est-ce  qu'il  nous  repute  comme  siens,  a  cause  de  sa  parole.  Et  nous  sommes  appelez  son  Eglise:  non  pas  que  ce  titre  nous  appartienne:  mais  comme  la  ville  de  Ierusalem  a  este  appelee  cite  saincte,  pour  ce  qu'elle  avoit  les  promesses  que  de  la  devoit  sortir  l'Evangile,  et  que  la  aussi  devoit  estre  manifeste  le  Redempteur  du  monde  :  aussi  pour  telle  raison  nous  sommes  appelez  fideles,  enfans  de  Dieu,  et  mis  au  reng  de  son  Eglise,  quand  l'Evangile  se  presche  au  milieu  de  nous,  et  qu'on  y  accorde,  combien  que  ce  ne  soit  pas  en  telle  reverance  ni  en  telle  integrite  qu'il  appartient.  Mais  quoy  qu'il  en  soit,  quand  sainct  Paul  use  de  telle  douceur  envers  les  Galatiens,  ce  n'est  pas  pour  les  nourrir  en  leur  vice,  ce  n'est  pas  pour  les  amadouer  en  vaines  flatteries,  comme  nous  voyons  qu'il  y  en  a  plusieurs  qui  desirent  d'estre  ainsi  flattez:  mais  nous  verrons  tantost  comme  il  les  redargue  si  vivement  que  rien  plus,  mesmes  il  les  appelle  insensez.  Et  comment  cela  s'accordera-il  ?  C'est  d'un  coste  il  veut  faire  valoir  la  grace  de  Dieu  qui  avoit  este  desployee  en  ceste  Eglise  la:  et  d'autre  coste  il  faut  qu'il  purge  les  vices  qui  y  estoyent,  comme  aussi  il  estoit  bien  requis.  En  cela  voyons  nous  donc  que  quand  Dieu  aura  plante  son  Eglise  en  quelque  lieu,  ce  n'est  pas  a  dire  que  tout  y  soit  a  priser,  et  qu'il  n'y  ait  que  vertu.  Comme  les  Papistes  sous  le  nom  de  l'Eglise  voudroyent  couvrir  toutes  abominations,  voire  les  plus  detestables  et  diaboliques  du  monde:  Comment?  L'Eglise  ne  peut  errer,  c'est  l'espouse  de  Iesus  Christ,  c'est  la  colomne  de  verite.  Voire,  mais  cependant  voila  des