47:300  Ioannes  Christi  doctrinam  amplexos  esse  quia  a  Deo  profectam  cognoscerent,  sed  non  fuisse  vivam  in  illis  fidem,  nec  qua  decet  virtute  praeditam  :  quia  non  dat  suis  Christus  spiritum  timoris,  sed  constantiae,  ut  libere  et  intrepide  confiteri  audeant,  quod  ab  ipso  didicerunt.  Etsi  non  arbitror  istos  prorsus  obmutuisse:  sed  quia  non  satis  ingenua  erat  eorum  confessio,  evangelista  meo  iudicio  simpliciter  negat  suam  fidem  professos  esse.  Ista  enim  legitima  erat  professio,  ut  palam  Christo  nomen  darent.  Quare  nemo  sibi  blandiatur,  qui  ulla  in  parte  tegit  ac  dissimulat  fidam  suam,  ne  incurrat  in  hominum  odia.  Nam  quantumvis  odiosum  sit  Christi  nomen,  non  est  excusabilis  timiditas,  quae  ab  eius  confessione  vel  minimum  deflectere  nos  cogit.  Observa  etiam  minus  esse  in  principibus  fortitudinis  et  constantiae,  quia  fere  in  illis  regnat  ambitio,  qua  nihil  magis  servile  est.  Atque  ut  uno  verbo  dicam,  terreni  honores  quasi  aureis  compedibus  hominem  ligant,  ne  libere  officium  suum  faciat.  Quo  aequius  obscuris  et  tenuibus  sors  sua  ferenda  est,  quia  multis  saltem  pessimis  laqueis  soluti  sunt.  Magnos  interea  et  nobiles  cum  sua  luctari  fortuna  decet,  ne  ipsos  impediat  quominus  se  Christo  submittant.  Pharisaeos  terrori  fuisse  commemorat  Ioannes:  non  quod  per  alios  scribas  et  sacerdotes  cuiquam  impune  liceret  Christi  se  vocare  discipulum,  sed  quia  sub  zeli  specie  impotentior  in  istis  fervebat  saevitia.  Eximia  quidem  virtus  est  tuendae  religionis  zelus:  sed  ubi  subest  hypocrisis,  nulla  potest  fingi  pestis  nocentior.  Quo  magis  rogandus  est  Dominus,  ut  nos  moderetur  certa  spiritus  sui  regula.  Ne  eiicerentur  extra  synagogam.  En  quid  illis  obstiterit,  nempe  infamiae  metus:  quia  eiecti  fuissent  e  synagoga.  Porro  hinc  apparet  quanta  sit  hominum  pravitas,  quae  optima  quaeque  Dei  instituta  non  modo  corrumpit  et  adulterat,  sed  in  exitialem  tyrannidem  vertit.  Excommunicatio  nervus  esse  debuerat  sanctae  disciplinae,  ut  poena  esset  in  promptu,  si  quis  ecclesiam  contemneret:  atqui  eo  traducta  fuerat  ut  quisquis  fateretur  se  esse  Christi  a  societate  fidelium  ex&ularet:  quemadmodum  hodie  papa  ad  eandem  tyrannidem  exercendam  ius  excommunicationis  falso  praetexit,  caeca  rabie  non  modo  fulminat  contra  omnes  pios,  sed  Christum  e  coelesti  solio  deiicere  conatur  et  tamen  titulum  sacrae  iurisdictionis,  qua  ecclesiam  suam  ornavit  Christus,  impudenter  obtendere  non  dubitat.  43.  Dilexerunt  enim  gloriam.  Quod  nulla  istis  iniecta  fuerit  superstitio,  sed  solum  apud  homines  probrum  fugitarint,  diserte  exprimit  evangelista.  Nam  si  plus  apud  eos  valuit  ambitio  quam  timor  Dei,  sequitur  inani  conscientiae  metu  fuisse  liberatos.  Iam  observent  lectores,  quantae  ignominiae  damnetur  apud  Deum  eorum  timiditas,  qui  fidem  suam  apud  homines  invidiae  metu  dissimulant.