41:300  dentur,  et  dealbentur,  et  excoquantur.  Primo  autem,  quemadmodum  nuper  attigi,  admonet  de  futuro  ecclesiae  statu  Danielem  et  pios  omnes,  ut  se  comparent  et  accingant  ad  pugnas,  et  colligant  invictam  fortitudinem,  quoniam  illis  haec  conditio  proposita  est,  ut  iter  faciant  per  medias  cruces.  Hoc  est  unum.  Deinde  angelus  etiam  docet  utilem  illis  fore  hanc  sortem,  quae  alioqui  videri  poterat  nimis  acerba.  Refugimus  enim  crucem,  quia  putamus  nobis  adversam.  Deus  autem  ostendit  nihil  esse  utilius  quam  ut  pii  exerceantur  per  varias  afflictiones.  Hoc  est  secundum.  Nam  per  se  afflictiones  possent  nos  consumere.  Coniicimur  enim  quasi  in  fornacem.  Quid  ergo  fieret,  nisi  Dominus  mirabiliter  mutaret  afflictionum  naturam,  ut  sint  nobis  adiumenta  in  salutem,  quae  essent  alioqui  exitio?  Caeterum  quum  excoquimur,  et  dealbamur,  et  purgamur,  hinc  videmus  Deum  optime  consulere  nostrae  saluti,  ubi  nos  cruce  premit,  et  rebus  adversis  subiicit.  Iam  tertio  significat  angelus  non  sufficere  unam  purgationem  duntaxat,  sed  opus  esse  multis.  Et  huc  spectat  congeries  verborum,  purgabuntur,  dealbabuntur,  et  excoquentur,  vel  fundentur.  Uno  verbo  summam  rei  poterat  complecti,  sed  quoniam  tota  vita  non  desinit  Deus  nos  varie  examinare,  ideo  tria  verba  simul  congessit  angelus,  ut  ostenderet  opus  esse  continua  purgatione  fidelibus,  quantisper  carnem  suam  gestant:  quemadmodum  ubi  quotidie  applicantur  vestes  in  usum,  opus  etiam  habent  purgatione.  Mantile  aliquod  sit  quasi  niveum,  tamen  contrahet  statim  sordes  ubi  fuerit  in  usu  vel  ad  unum  diem.  Ergo  necesse  erit  subinde  ablui  ut  redeat  iterum  ad  eandem  munditiem.  Sic  et  nos  quoniam  versamur  inter  multas  sordes,  fieri  non  potest  quamdiu  peregrinamur  in  mundo,  quin  aliis  atque  aliis  sordibus  inquinemur.  Quum  ergo  non  desinant  fideles  infici  contagione  multorum  vitiorum,  ideo  necesse  est  etiam  ipsos  quotidie  purgari,  et  diversis  modis.  Haec  igitur  tria  distincte  nobis  tenenda  sunt.  Postea  adiungit  angelus  impios  impie  acturos,  neque  quidquam  intellecturos.,  sed  prudentes  tamen  fore  praeditos  intelligentia.  Hic  munire  voluit  pios  contra  scandalum  quod  illis  obiicitur,  ubi  vident  profanos  Dei  contemptores  ab  omni  parte  sic  exsultare,  ut  quasi  *  conspuant  in  faciem  ipsius  Dei.  Quum  ergo  fideles  vident  mundum  ita  refertum  esse  impiis,  vident  tantam  ipsorum  lasciviam,  ac  si  nullus  esset  in  coelo  Deus,  fieri  non  potest,  quin  graviter  turbentur,  ac  percellantur.  Ne  ergo  haec  tentatio  eorum  animos  concutiat,  admonet  angelus  impios  impie  se  gesturos,  quasi  diceret,  non  est  quod  vel  tu  Daniel,  vel  alii  fideles  pendeatis  ab  aliorum  exemplis.  Satan  enim  astute  vobis  obiiciet  quae  vos  abripiant  in  contemptum  Dei  et  abyssum  impietatis,  nisi  sedulo  vobis  caveatis.  Sed  ne  moreris  vel  tu,  vel  alii  pii  quid  impii  agant.