58:30  30  il  n'en  est  mention,  ne  nouvelle.  Et  d'autant  que  Dieu  est  fraude  de  son  honneur,  voila  pourquoy  il  retire  sa  main:  ou  bien  s'il  donne  lignee,  d'autant  que  ce  sont  gens  profanes,  il  leur  donnera  des  enfans  qui  leur  creveront  les  yeux.  Car  les  enfans  seront  comme  de  petit  serpens,  ou  des  espines,  pour  les  piquer,  et  navrer  iusques  au  profond  du  coeur.  Voila  qui  est  cause  qu'on  en  void  beaucoup  qui  n'ont  point  de  lignee  :  ou  s'ils  en  ont,  c'est  pour  leur  faire  plus  de  mal:  d'autant  qu'ils  ne  se  sont  point  adressez  a  Dieu,  pour  obtenir  le  tout  de  sa  benediction.  Notons  bien  donc  ce  qui  nous  est  ici  monstre  de  nostre  pere  Isaac:  c'est  que  voiant  sa  femme  sterile,  il  s'est  adresse  a  Dieu,  sachant  bien  que  c'estoit  de  lui  qu'il  devoit  demander  lignee.  Et  de  fait  qu'alleguera-  on  ici  contre  ceste  benediction?  Si  nous  regardons  ce  qui  est  escrit  en  Iob  (14,  1),  que  quand  un  enfant  vient  au  monde,  il  est  la  comme  une  image  vive,  d'une  vertu  incomprehensible  de  Dieu,  laquelle  ne  peut  estre  assez  prisee.  Car  dequoy  un  enfant  est-il  engendre?  et  apres  qu'il  est  conceu,  comment  vit-il  au  ventre  de  sa  mere?  Et  puis,  comment  est  ce  qu'il  en  sort?  Si  on  regarde  toutes  ces  choses,  qui  sera  celui  si  abruti,  de  dire  que  les  hommes  engendrent  de  leurs  forces  et  par  leur  industrie?  Ainsi  que  nous  retenions  bien  ceste  lecon  :  C'est,  que  ceux  qui  sont  mariez,  s'ils  appetent  d'avoir  lignee,  qu'ils  la  demandent  a  Dieu:  voire  pour  deux  raisons.  La  premiere,  D'autant  que  Dieu  s'est  reserve  cela  en  sa  main:  comme  nous  l'avons  maintenant  allegue  du  Pseaume,  La  seconde  c'est  que  ce  n'est  point  assez  que  les  maisons  soient  peuplees  d'enfans,  sinon  que  Dieu  gouverne  tousiours.  Car  il  vaudroit  mieux  qu'ils  n'eussent  point  de  lignee  du  tout,  que  d'avoir  une  semence  perverse,  maudite  et  pleine  de  malice.  Ainsi  donc,  que  les  peres  apprenent  d'ensuivre  (en  c'est  endroit)  l'exemple  d'Isaac.  Mais  notons  aussi  quant  et  quant,  qu'Isaac  n'a  point  prie  seulement  pour  avoir  lignee,  selon  l'appetit  naturel  des  hommes:  mais  qu'il  a  regarde  plus  haut,  c'est  assavoir,  qu'il  faloit  que  de  lui  sortist  le  salut  du  monde,  en  la  personne  de  nostre  Seigneur  Iesus  Christ:  ce  qui  sera  deduit  plus  au  long  ci  apres.  Or  nous  nous  prosternerons  devant  la  sainte  maieste  de  nostre  bon  Dieu,  en  cognoissance  de  nos  fautes,  le  priant  que  de  plus  en  plus  il  les  nous  face  sentir  :  et  que  ce  soit  pour  nous  humilier,  et  pour  nous  induire  a  une  vraye  repentance,  et  que  nous  soions  tellement  touchez  de  crainte,  que  nous  ne  demandions  sinon  estre  depouillez  de  toutes  nos  affections  et  cupiditez  terrestres,  pour  estre  revestus  de  sa  iustice,  iusques  a  ce  qu'il  nous  ait  attirez  en  la  pleine  et  entiere  perfection.  Que  non  seulement  il  nous  face  ce  bien,  etc.