48:30  12.  Alii  subsannantes.  Hinc  apparet,  quam  prodigiosa  sit  hominum  tam  socordia  quam  improbitas,  quum  illis  Satan  mentem  abstulit.  Si  palam  e  coelo  descendat  Deus,  vix  clarius  conspici  posset  eius  maiestas  quam  in  hoc  miraculo.  Quisquis  guttam  integri  sensus  habet,  cum  solo  auditu  percelli  necesse  est.  Quam  igitur  belluini  illi,  qui  oculis  cernunt,  et  tamen  subsannant?  suisque  facetiis  Dei  potentiam  eludere  conantur?  Verum  ita  res  habet.  Nihil  tam  admirabile  esse  potest,  quod  non  in  ludibrium  vertant,  qui  nulla  Dei  cura  tanguntur,  quoniam  data  opera  callum  inscitiae  in  rebus  maxime  dilucidis  sibi  obducunt.  Et  iusta  est  Dei,ultio  adversus  talem  superbiam,  ut  Satanae  in  caecum  furorem  praecipitandos  tradat.  Quare  non  est  quod  miremur,  si  hodie  plerique  ad  tantam  lucem  caecutiunt,  si  surdi  sunt  ad  tam  apertam  doctrinam,  imo  petulanter  respuunt  oblatam  sibi  salutem.  Nam  si  insolita  Dei  opera,  quibus  magnifice  potentiam  suam  illustrat,  obnoxia  sunt  hominum  ludibriis,  quid  de  doctrina  fiet,  quae  nihil  apud  eos  resipit,  nisi  vulgare?  Quanquam  Lucas  non  pessimos  fuisse  aut  penitus  deploratos  significat,  qui  riserunt:  sed  exponere  potius  voluit,  qualiter  affectum  fuerit  hominum  vulgus  hoc  miraculo.  Et  sane  ita  semper  res  habuit  in  mundo,  ut  pauci  vero  Dei  sensu  tacti  fuerint,  quoties  se  patefecit.  Nec  mirum:  rara  enim  et  paucorum  hominum  virtus  est  religio:  quae  sanae  intelligentiae  initium  est.  Caeterum,  ut  maior  pars  ferrea  quadam  pervicacia  operum  Dei  considerationem  repellat,  nunquam  tamen  fructu  carent.  Quemadmodum  videre  in  hac  historia  licet.  14.  Stans  autem  Petrus  cum  undecim,  extulit  vocem  suam  et  loquutus  est  illis:  Viri  Iudaei,  et  omnes  qui  habitatis  Ierosolymae,  notum  hoc  sit  vobis,  et  auribus  percipite  verba  mea.  15.  Non  enim,  quemadmodum  existimatis,  isti  ebrii  sunt:  est  emm  hora  diei  tertia.  16.  Sed  hoc  est  quod  dictum  est  per  prophetam  Ioel:  17.  Et  erit  in  ultimis  diebus,  dicit  Deus,  effundam  ex  spiritu  meo  super  omnem  carnem,  et  prophetabunt  filii  vestri,  et  filiae  vestrae,  et  iuvenes  vestri  visiones  videbunt,  et  seniores  vestri  somnia  somniabunt:  18.  utique  super  servos  meos  et  super  ancillas  meas  in  diebus  illis  effundam  de  spiritu  meo  et  prophetabunt:  19.  et  dabo  prodigia  in  coelo  superne,  et  signa  super  terram  inferne,  sanguinem  et  ignem  et  vaporem  fumi:  20.  sol  vertetur  in  tenebras  et  luna  in  sanguinem,  priusquam  veniat  dies  Domini  magnus  et  illustris.  21.  Et  erit,  quisquis  invocaverit  nomen  Domini,  salvus  erit  14.  Stans  autem  Petrus.  Standi  verbo  gravem  in  coetu  concionem  fuisse  habitam  significat.  Surgebant  enim  verba  ad  populum  facturi,  quo  facilius  audiri  possent.  Summa  autem  huius  concionis  est:  quod