42:30  Dieu  avoit  ordonne  qu'il  vouloit  estre  adore  seulement  en  Ierusalem,  c'est  a  dire  qu'il  vouloit  qu'on  luy  feist  la  les  sacrifices,  lesquels  il  avoit  commandes  en  la  loy.  Il  est  vray  que  quelque  part  que  fussent  les  Iuifs,  ils  pouvoient  bien  adorer  Dieu,  mais  c'estoit  en  regardant  au  pays  de  Iudee,  quand  il  ne  leur  estoit  pas  licite  de  sacrifier,  comme  nous  voions  qu'en  ha  fait  le  prophete  Daniel  estant  en  Babilonne,  et  ne  faloit  pas  que  personne  eust  cette  presomption  de  s'ingerer  a  sacrifier  autre  part,  qu'en  Ierusalem,  la  ou  le  temple  estoit  edifie  et  basti,  la  raison  est,  pour  ce  que  Dieu  aime  mieux  obeissance  que  tous  les  sacrifices,  il  prefere  ce  que  les  hommes  luy  font,  quand  ils  suivent  purement  sa  parole,  a  tout  le  reste,  quand  ils  inventent  quelque  chose  de  leur  cerveau,  mais  il  veut  qu'ils  suivent  ce  qu'il  ha  commande,  et  qu'ils  ne  facent  ne  plus  ne  moins:  or  cettui-ci  s'en  va  contre  la  defense  expresse  de  la  loy,  bastir  un  autel  en  Egypte.  Ainsi  donc  voila  un  apostat,  un  meschant  qui  veut  destourner  le  peuple  de  l'obeissance  de  Dieu.  Ceci  s'adresse  aussi  bien  a  nous,  car  nous  avons  la  mesme  regle,  qui  ha  este  donnee  alors,  c'est  que  Dieu  ne  veut  point  que  les  hommes  se  gouvernent  a  leur  appetit,  mais  que  nous  aions  cette  humilite  en  nous,  de  le  servir  et  honorer,  comme  il  nous  le  commande:  il  est  vray  que  nous  n'aurons  point  auiourd'huy  tant  de  choses  commandees,  comme  les  peres  qui  ont  vescu  en  l'ancien  Testament,  et  aussi  Dieu  ne  veut  point  que  nous  aions  ces  ceremonies  la,  car  ce  ne  seroit  que  pour  obscurcir  la  clarte  de  nostre  Seigneur  Iesus  Christ,  mais  il  veut  que  nous  le  servions  en  obeissance,  c'est  a  dire,  que  quand  il  nous  aura  commande  quelque  chose  (comme  nous  voions  qu'il  le  fait  par  sa  parole),  que  nous  le  suivions  sans  aucun  contredit,  et  que  nous  n'alleguions  point,  Et  pourquoy  est-ce  donc  que  Dieu  n'a  declare  comment  c'est  qu'il  veut  que  nous  le  servions,  comme  il  ha  fait  aux  Iuifs?  il  nous  le  declare  suffisamment,  quand  il  nous  monstre  que  nous  le  servions,  mettant  nostre  fiance  en  luy,  et  puis  aians  proteste  cela  par  prieres  et  oraisons,  nous  avons  tout  nostre  refuge  en  luy,  comme  les  prieres  sont  le  principal  sacrifice  que  Dieu  ha  ordonne  de  tout  temps,  ainsi  qu'il  le  declare  au  Pseaume  cinquantieme,  voila  le  sacrifice  que  ie  demande  (dit-il)  et  que  i'advoue  c'est  qu'on  m'invoque  au  iour  de  la  necessite,  et  qu'on  me  rende  action  de  graces,  et  puis  apres,  qu'un  chacun  s'offre  a  luy,  et  que  nous  renoncions  a  toutes  nos  meschantes  affections,  a  fin  qu'estans  renouveles  par  son  sainct  Esprit,  nous  facions  ce  qu'il  nous  commande,  voila  quel  est  le  service  de  Dieu:  et  il  est  asses  exprime  en  l'escriture  saincte,  il  ne  faut  point  que  nous  en  aions  plus  ample  declaration,  puis  qu'ainsi  est  donc,  notons  que  tous  ceux  qui  voudront  inventer  des  facons  30