39:30  ipsum  coniicimus  oculos,  quam  detestabile  est  illud  fastidium?  Hoc  igitur  primum  est,  quod  Iudaei  scientes  et  volentes  contempserint  Deum  et  legem  ipsius.  Deinde  amplificat  crimen  quum  dicit,  Et  docui  eos,  mane  surrexi,  et  docui,  et  ipsi  non  audierunt  Si  tantum  lex  semel  fuisset  promulgata,  Iudaei  poterant  obiicere  se  magna  ex  parte  non  esse  literatos:  sed  nullus  color  superfuit  quum  subinde  prophetae  legem  interpretarentur,  quemadmodum  etiam  pollicitus  fuerat  Deus  per  Mosen,  prophetam  suscitabo  tibi  e  medio  fratrum  tuorum.  Significat  enim  perpetuum  hoc  fore  beneficium  in  ecclesia,  ut  nunquam  desint  prophetae,  qui  populo  viam  ostendant.  Opponit  enim  prophetas  aruspicibus,  divinis,  auguribus,  et  aliis  omnibus  diaboli  ministris:  quasi  diceret  non  esse  cur  populus  appetat  illas  Satanae  praestigias,  quum  sufficiant  prophetae.  Deus  ergo  hic,  ne  Iudaei  obmurmurent  secum  nimis  duriter  agi,  ostendit  se  docuisse.  Transfert  enim  in  suam  personam  quod  per  prophetas  exercuerat  docendi  munus.  Et  certe  prophetae  et  doctores  nihil  aliud  sunt  quam  spiritus  sancti  organa.  Neque  enim  quisquam  ad  docendum  erit  idoneus,  nisi  quatenus  dirigitur  a  spiritu  Dei.  Merito  ergo  Deus  sibi  vendicat  has  partes,  et  vult  sibi  manere  integram  laudem  aedificationis  ecclesiae  suae,  tametsi  utitur  hominum  opera.  Dicit  hoc  sensu,  se  docuisse.  Deinde  adiungit,  se  mane  surrexisse,  hoc  est  se  fuisse  sedulum:  quemadmodum  paterfamilias  qui  sollicitus  est  de  suis,  mane  inquirit  quomodo  habeant,  et  circumspicit  per  totam  domum:  ita  etiam  Deus  hic  diligentiam  suam  praedicat  in  docendis  Israelitis:  quasi  diceret  non  modo  versari  legem  ante  ipsorum  oculos,  ex  qua  discant  quid  rectum  sit,  sed  etiam  prophetas  accedere,  qui  non  desinant  ipsos  monere  et  hortari.  Est  autem  haec  loquendi  forma  digna  observatu,  quia  hinc  colligimus  quam  foeda  sit  eorum  ingratitudo  qui  respuunt  doctrinam  propheticam.  Neque  enim  in  homines  tantum  sunt  iniurii,  sed  potius  in  Deum  ipsum,  quemadmodum  Christus  pronuntiat,  Qui  vos  audit,  me  audit,  qui  vos  reiicit  me  reiicit  (Luc.  10,  16).  Commendat  igitur  haec  loquutio  fidem  propheticae  doctrinae,  ubi  Deus  in  medium  prodit,  et  ostendit  se  agere  per  servos  suos.  Ab  altera  autem  parte  colligimus  quam  incomparabile  bonum  sit  habere  fidos  et  probos  doctores,  quia  Deus  per  eorum  manum  et  operam  certo  declarat  se  curam  gerere  salutis  nostrae,  ac  si  vigilias  ageret,  ac  si  mane  surgeret,  ac  si  nos  inviseret.  Et  praedicatio  evangelii  non  abs  re  etiam  vocatur  Dei  visitatio.  Non  est  ergo  cur  quidquam  melius  expetamus,  ubi  Deus  nobis  adest  per  sermonem  suum,  quia  habemus  certum  testimonium  praesentiae  eius  quoties  surgunt  veri  et  fidi  doctores.  Addit,  ad  recipiendam  correctionem.  Significat  per  nomen  "OD  Iudaeos  non  peccasse  ignorantia,  sed