37:30  infirmitate  perfici.  Nos  igitur  nobis  probe  eius  conscios  esse  oportet,  ut  Dei  virtuti  locum  demus.  Hac  doctrina  Iudaeis  admodum  opus  fuit,  qui  duro  illo  exsilio  affligebantur:  sed  nobis  quoque  in  hac  misera  ecclesiae  dissipatione  vehementer  necessaria  est.  (Sustollent  alas.)  Idem  hic  a  propheta  dici  putant  quod  habetur  Psalm.  103  (v.  5):  Renovabitur  ut  aquilae  iuventus  tua.  Certum  est  aquilam  inter  reliquas  aves  admodum  longaevam  esse.  Aristoteles  et  Plinius  testantur  eam  senectute  nunquam  mori,  sed  inedia:  nempe  quod  superiore  rostro  nimium  excrescente,  cibum  in  os  ingerere  non  possit,  ac  solo  potu  diu  vescatur.  Zaadias  quidam,  ut  Iudaei  omnes  audaces  sunt  in  confingendis  fabulis,  fingit  aquilam  in  regionem  soli  propinquam  evolare,  atque  ita  ad  solem  accedere,  ut  veteres  pennae  adurantur,  atque  in  earum  locum  novae  aliae  succrescant:  sed  hoc  ridiculum  prorsus  et  fabulosum  est.  Significat  autem  propheta  eos  qui  Domino  confidunt  aquilarum  more  vegetos  fore  usque  ad  ultimam  senectutem.  Sed  quum  aquilae  altius  volent  quam  reliquae  aves,  in  quo  singularem  quandam  agilitatem  ostendunt,  unde  etiam  proverbium  Aquila  in  nubibus:  ideo  hic  locus  non  tantum  de  vita  diuturna,  sed  etiam  de  vigore  et  agilitate  accipi  potest:  ut  Isaias  postquam  vires  ipsorum  recreari  ostendit,  subiiciat  etiam  vegetari  ipsos,  et  in  sublime  extolli.  Eodem  pertinet  quod  sequitur  de  cursu  infatigabili:  perinde  ac  si  diceret,  Dominum  ita  adfuturum  suis,  ut  peragant  cursum  suum  sine  ulla  molestia.  Est  enim  figurata  loquutio,  qua  significat  pios  divinitus  suffultos  semper  fore  agiles  ad  munus  suum  obeundum.  Atqui  tot  aerumnae  nobis  sustinendae  sunt  in  hac  vita,  dicet  quispiam,  qui  ergo  nos  lassitudinis  immunes  fore  dicit?  Respondeo,  sic  pios  affici  molestiis  et  fatigari,  ut  postea  emergant,  ac  sentiant  se  Dei  virtute  recreatos.  Iis  enim  accidit  quod  ait  Paulus  (2.  Cor.  4,  8.  9),  Dum  in  omnibus  premimur,  non  opprimimur:  laboramus,  at  non  destituimur:  persequutionem  patimur,  at  non  deserimur:  deiicimur,  at  non  perimus.  Discamus  ergo  confugere  ad  Dominum,  qui  variis  laboribus  exantlatis  nos  tandem  ad  portum  perducet.  Qui  enim  viam  stravit,  nosque  in  stadio  suo  collocatos  progredi  iussit,  non  ad  unum  modo  diem  iuvare  vult,  ut  in  medio  cursu  deserat,  sed  perducere  usque  ad  metam.