36:30  correctioni  relinquat.  Quod  certe  instar  portenti  est,  filios  patri  non  esse  morigeros:  atque  adeo  benefico  patri  et  assiduam  de  suis  curam  gerenti.  Lycurgus  adversus  ingratos  legem  ferre  noluit,  quod  prodigiosa  res  esset,  beneficium  non  agnoscere.  Duplex  ergo  portentum  est,  ingrati  filii  erga  patrem:  triplex  vero,  erga  liberalem  et  beneficum  patrem.  Nam  filios  nominat,  non  honoris  causa,  sed  ut  defectionem  illam  magis  exaggeret,  atque  invisam  reddat.  3.  {Cognovit  bos.)  Haec  comparatio  magis  amplificat  crimen  defectionis.  Poterat  enim  Dominus  populum  suum  conferre  cum  gentibus:  sed  magis  urget,  quum  ipsum  mutis  bestiis  comparat,  iisque  stupidiorem  esse  ostendit.  Illae  enim  quamvis  mente  et  ratione  careant,  sunt  tamen  dociles:  ea  saltem  parte,  quod  agnoscunt  eos  a  quibus  pascuntur.  Ergo  quum  hunc  populum  Deus  non  tantum  pavisset  ad  praesepe,  sed  liberaliter  aluisset,  non  secus  ac  pater  filios  solet,  nec  tantum  saginasset  ventres,  sed  spirituale  alimentum  quotidie  porrigeret:  postquam  tantam  socordiam  expertus  est,  merito  dignum  censet  qui  in  beluarum  non  hominum  schola  doceatur:  itaque  ad  boves  et  asinos  ipsum  amandat,  ut  ab  iis  discat  quid  sit  officii  sui.  Nec  profecto  mirum:  saepe  enim  bestiae  naturae  ordinem  melius  sequuntur,  et  plus  humanitatis  prae  se  ferunt  quam  homines  ipsi.  Et  ne  multa  exempla  referam,  sufficiet  quod  hic  proposuit  Isaias,  stupidissimas  scilicet  et  tardissimas  bestias  tamen  dominis  et  rectoribus  suis  sese  submittere.  Quod  si  etiam  alia  considerare  libeat,  quam  multa  reperientur?  Quid  enim,  quod  nullum  animal  in  genus  suum  saevire  solet,  et  agnoscit  in  altero  similitudinem  suam?  quid  etiam,  quod  omnia  animantia  tantum  diligentiae  adhibere  soleant  in  educando  foetu,  quum  saepe  mulieres  naturae  et  humanitatis  omnis  oblitae  liberos  abiiciant  ?  quid  porro,  quod  id  tantum  cibi  et  potus  sumere  soleant,  quod  ad  tuendam  vitam  et  sustinendas  vires  sufficiat,  quum  homines  ingurgitent  sese  ac  prorsus  obruant?  quid  denique,  quod  nulla  in  re  transgrediuntur  leges  sibi  a  natura  praestitutas?  Papistae,  ut  solent  genuinum  scripturarum  sensum  evertere  et  suis  nugis  inficere  omnia  Dei  mysteria,  insulsam  hic  fabulam  commenti  sunt.  Finxerunt  enim  boves  et  asinos  in  praesepi  Christum,  quum  nasceretur,  adorasse.  In  quo  egregios  se  esse  asinos  ostendunt.  (Atque  utinam  ipsi  asinum  quem  fingunt  imitarentur:  hoc  est,  saltem  asini  essent  Christum  adorantes,  ac  non  calcitrantes  adversus  eius  maiestatem.)  Nec  enim  de  miraculo  hic  agit  propheta,  sed  de  ordine  naturae:  quem  qui  pervertunt  velut  monstra  esse  docet.  Non  sunt  autem  confingenda  nova  miracula  ad  autoritatem  Christo  conciliandam.  Sic  enim  falsa  veris  permiscendo  periculum  est  ne  utrisque  fides  derogetur.  Nec  vero  dubium  est  quin,