33:30  que  ce  soit.  Ceux  donc  qui  cerchent  leur  avantage  et  profit,  il  n'y  a  nulle  doute  qu'ils  sont  hypocrites,  et  que  leur  coeur  est  corrompu:  quelques  beaux  zelateurs  qu'ils  soyent,  Dieu  declare  qu'il  n'y  a  qu'ordure  et  poison  en  leur  coeur.  Et  pourquoy?  s'il  y  a  rondeur,  il  faut  qu'il  y  ait  droiture,  c'est  a  dire,  si  l'affection  est  pure  au  dedans,  quand  nous  conversons  avec  les  hommes,  nous  procurerons  le  bien  d'un  chacun,  tellement  que  nous  ne  serons  point  adonnez  a  nous,  et  a  nostre  particulier,  mais  nous  aurons  ceste  equite,  que  Iesus  Christ  dit  estre  la  reigle  de  vie,  et  toute  la  somme  de  la  Loy,  et  des  Prophetes,  que  nous  ne  facions  a  aucun  sinon  ce  que  nous  voudrions  qu'on  nous  feist.  Ainsi  donc  notons,  qu'en  ceste  louange  de  Iob  il  y  a  beaucoup  de  gens  qui  sont  condamnez,  quand  non  seulement  le  Sainct  Esprit  declare,  que  cest  homme  a  eu  une  integrite  devant  Dieu,  mais  aussi  droiture  et  rondeur  entre  les  hommes.  Ceste  rondeur  qu'il  prononce  servira  de  sentence  et  condamnation  a  tous  ceux  qui  seront  pleins  de  malice,  a  tous  ceux  qui  ne  demandent  qu'a  ravir  et  attrapper  le  bien  d'autruy,  qui  ne  demandent  qu'a  piller  la  substance  des  autres.  Ceux-la  sont  condamnez  en  ce  mot  ici.  Or  il  sensuit,  Qu'il  craignoit  Dieu,  qu'il  estoit  homme  craignant  Dieu,  et  se  retirant  du  mal.  Et  aussi  quand  Iob  a  eu  ceste  louange  d'avoir  garde  droiture  et  equite  entre  les  hommes,  il  falloit  bien  qu'il  cheminast  devant  Dieu  :  car  sans  cela  le  reste  n'estoit  rien  estime.  Vray  est  que  nous  ne  pouvons  vivre  avec  nos  prochains  (comme  desia  i'ay  dit)  sans  faire  mal  a  nul,  procurant  le  bien  d'un  chacun,  si  ce  n'est  que  nous  regardions  a  Dieu:  car  ceux  qui  suivent  leur  naturel,  encores  qu'ils  ayent  de  belles  vertus  (ce  semblera)  toutesfois  ils  sont  preoccupez  de  l'amour  d'eux-mesmes,  et  n'y  a  qu'ambition  qui  les  pousse,  ou  quelque  autre  regard,  tellement  que  tout  ce  qu'il  y  a  d'apparence  de  vertu  en  eux,  est  corrumpu  par  cela:  mais  combien  que  nous  ne  puissions  point  avoir  ceste  droiture  sans  craindre  Dieu,  si  est-ce  que  ce  sont  deux  choses  distinctes,  que  de  servir  Dieu,  et  honorer  nos  prochains,  comme  aussi  Dieu  les  a  distinguees  en  sa  Loy,  quand  il  a  voulu  qu'elle  fust  descrite  en  deux  tables.  Notons  donc,  que  comme  par  ci  devant  sous  ce  mot  de  droiture,  le  Sainct  Esprit  a  voulu  declarer  comme  Iob  a  converse  entre  les  hommes,  aussi  quand  il  dit,  Qu'il  a  eu  crainte  de  Dieu,  il  veut  amener  la  religion  qui  estoit  en  luy.  Or  par  cela  nous  sommes  admonnester,  ques  pour  bien  regler  nostre  vie,  il  faut  que  nous  regardions  Dieu,  et  puis  nos  prochains:  que  nous  regardions  Dieu  (di-ie)  a  fin  de  nous  adonner  a  luy,  a  fin  de  luy  rendre  l'hommage  qui  luy  est  deu:  que  nous  regardions  nos  prochains,