3:30  parfaite  par  l'authorité  du  sacré  et  general  concile,  s'en  alla  en  fumée:  sinon  que  ledit  Aymé1)  fut  appaisé  par  un  chappeau  de  Cardinal,  comme  un  chien  abayant,  par  une  piece  de  pain.  De  ces  heretiques,  rebelles  et  contumax  sont  issus  tous  les  Papes,  Cardinaux,  Evesques,  Abbez  et  Prestres  qui  ont  esté  depuis.  Il  est  necessaire  qu'ils  soyent  icy  surprins  au  passage.  Car  auquel  costé  mettront-ils  le  nom  de  l'Eglise?  Nieront-ils  le  concile  avoir  esté  general,  auquel  il  ne  defailloit  rien  quant  à  la  maiesté  exterieure?  veu  que  solennellement  il  avoit  esté  denoncé  par  double  bulle,  dedié  par  le  Legat  du  sainct  siege  Apostolique,  lequel  y  presidoit,  bien  ordonné  en  toutes  ceremonies,  et  persevera  iusques  en  la  fin  en  une  mesme  dignité?  Confesseront-ils  Eugenius  schismatique,  avec  toute  sa  bende,  par  laquelle  ils  ont  esté  consacrez?  Il  faut  donc  qu'ils  diffinissent  autrement  la  forme  de  l'Eglise:  ou  tant  qu'ils  sont,  selon  leur  doctrine  mesme,  seront  reputez  de  nous  schismatiques,  puis  que  sciemment  et  de  leur  vouloir  ils  ont2)  esté  ordonnez  par  heretiques.  Et  s'il  n'eust  iamais  esté  experimenté  par  cy  devant,  que  l'Eglise  n'est  point  liée  à  pompes  exterieures,  ils  nous  en  baillent  assez  certaine  experience,  quand  sous  le  titre  et  couleur  de  l'Eglise  ils  se  sont  orgueilleusement  fait  craindre  au  monde:  combien  qu'ils  fussent  pestes  mortelles  de  l'Eglise.  Ie  ne  parle  point  de  leurs  moeurs  et  actes  execrables,  desquels  toute  leur  vie  est  remplie,  puis  qu'ils  se  disent  estre  Pharisiens,  lesquels  il  faille  escouter,  et  non  pas  ensuyvre.  Mais  si  vous  voulez  departir  un  peu  de  vostre  loisir,  Sire,3)  à  lire  noz  enseignemens,  vous  cognoistrez  clairement  que  leur  doctrine  mesme,  pour  laquelle  ils  veulent  estre  recogneuz  pour  l'Eglise,  est  une  cruelle  gehenne  et  boucherie  des  ames,  un  flambeau,  une  ruine  et  une  dissipation  de  l'Eglise.  Finalement,  c'est  perversement  fait  à  eux,  de  reprocher  combien  d'esmeutes,  troubles  et  contentions  a  apres  soy  attiré  la  predication  de  nostre  doc-