27:30  nous  soyons  desbauchez,  ne  que  nous  venions  a  rompre  a  nostre  escient  l'alliance  qui  doit  estre  inviolable  aussi  bien  de  nostre  coste  par  obeissance  de  foy,  comme  luy  la  garde,  voire  avec  une  telle  constance,  qu'encores  que  iournellement  nous  l'offensions,  qu'il  ne  laisse  pas  de  tousiours  demeurer  ferme  en  son  propos.  Et  pour  estre  mieux  asseurez  de  ceste  doctrine,  tousiours  revenons  a  ce  qui  est  dit:  Que  la  terre  de  Canaan  a  este  comme  une  arre  de  l'heritage  eternel  aux  peres  qui  ont  vescu  sous  la  Loy  :  et  ainsi  ce  qui  est  contenu  en  l'Escriture  saincte,  nous  doit  estre  comme  un  miroir,  et  une  figure  en  laquelle  nous  contemplions  comment  c'est  que  Dieu  nous  conduit,  iusques  a  ce  que  nous  soyons  parvenus  en  la  vie  eternelle.  Le  peuple  d'Israel  a  este  choisi  devant  qu'il  fust  nay,  Dieu  luy  a  manifeste  sa  grace  par  la  Loy:  et  au  reste  il  l'a  chastie,  qu'il  n'a  pas  voulu  du  premier  coup  le  mettre  en  possession  de  l'heritage  promis,  comme  il  n'en  estoit  pas  digne  :  mais  si  est-ce  qu'en  la  fin  il  y  est  parvenu.  Ainsi  cognoissons  que  nostre  Seigneur  n'a  pas  attendu  que  nous  vinssions  a  luy  pour  nous  recevoir:  mais  il  nous  a  prevenus  par  sa  bonte  infinie,  devant  la  creation  du  monde  il  nous  a  eleus,  il  nous  a  offert  sa  grace,  et  l'a  ratifiee  par  la  predication  de  l'Evangile,  comme  la  Loy  avoit  este  publiee  par  la  main  de  Moyse:  car  nostre  Seigneur  Iesus  Christ  a  voulu  estre  tesmoin  fidele  de  Dieu  son  Pere,  et  de  l'amour  qu'il  nous  porte:  et  d'autant  qu'il  ne  converse  plus  ici  bas  en  personne  avec  nous,  il  a  constitue  ses  ministres  ausquels  il  a  donne  authorite  de  prescher  en  son  nom,  et  quant  et  quant  commandement  a  tout  le  peuple  de  les  recevoir,  disant:  Qui  vous  escoutte,  il  m'escoutte:  et  leur  a  baille  charge  expresse  d'annoncer  la  remission  des  pechez,  comme  s'ils  retiroyent  les  povres  ames  captives  de  la  servitude  d'enfer.  Voila  donc  nostre  Seigneur  Iesus  Christ  qui  nous  a  manifeste  la  grace  qui  nous  estoit  incogneue  auparavant:  mais  nous  en  faisons  mal  nostre  profit.  Car  combien  que  nous  ayons  este  baptisez  des  nostre  enfance:  quand  nous  venons  en  aage  de  discretion,  par  ou  commencons-nous  de  monstrer  que  nous  avons  quelque  sens,  sinon  en  choisissant  le  mal,  comme  si  nous  voulions  despitter  Dieu  a  nostre  sceu?  Et  puis  outre  cela,  quand  nostre  Seigneur  nous  instruit,  et  qu'il  nous  redresse  par  sa  parolle,  qu'il  ne  cesse  de  nous  remonstrer  nos  fautes  afin  de  nous  matter,  et  rompre,  et  de  nous  attirer  a  repentance:  comment  sommes-nous  durs  a  l'esperon?  Comment  en  faisons-nous?  N'avons-nous  point  une  malice  tant  obstinee,  qu'on  ne  nous  peut  gagner  en  facon  que  ce  soit?  Pour  ceste  cause  il  faut  qu'il  nous  envoye  beaucoup  de  chastimens,  et  que  ceste  vie  presente  nous  soit  comme  un  desert,  et