1:30  [CO  1.  30]  et  maculas  oris  nostri  vulgo  intuemur.  Proprieque  haec  ipsa  scripta  lex,  testimonium  est  duntaxat  legis  naturalis,  quod  memoriam  nostram  saepius  excitet,  et  inculcet  ea  quae,  docente  intus  lege  naturali,  non  satis  didiceramus.  Nunc  intelligere  promp-  [OS  40]  tum  est,  quid  ex  lege  discendum  sit:  nempe  Deum  creatorem  esse,  dominum  ac  patrem  nostrum;  hac  ratione  deberi  illi  a  nobis  gloriam,  honorem,  amorem;  iam  cum  nemo  ex  nobis  partibus  suis  defungatur,  omnes  nos  maledictione,  iudicio,  morte  demum  aeterna  dignos  esse;  quaerendam  igitur  aliam  salutis  viam, [p. 48]  quam  per  operum  nostrorum  iustitiam.  Ea  est  peccatorum  remissio.  Deinde,  cum  non  sit  nostrae  virtutis  aut  facultatis  exsolvere  quod  legi  debemus,  de  nobis  desperandum  esse  ac  aliunde  opem  poscendam  et  expectandam.  Postquam  in  hanc  humilitatem  ac  submissionem  descendimus,  tum  nobis  Dominus  affulget,  seque  facilem,  clementem,  mansuetum,  indulgentem  exhibet,  de  quo  scriptum  est:  quod  superbis  resistat,  humilibus  det  gratiam  (Iac.  4.  1  Petr.  5).  Ac  primum,  si  eius  iram  cum  fiducia  deprecamur  ac  veniam  poscimus,  eam  nobis  haud  dubie  indulget,  quidquid  peccata  nostra  merebantur  remittit,  ac  recipit  in  gratiam.  Deinde,  si  opem  ac  manum  eius  imploramus,  certo  persuasi,  fore  ut  illius  praesidiis  instructi  omnia  possimus,  pro  bona  sua  voluntate  novum  cor  (Ez.  36),  quo  velimus,  novamque,  virtutem,  qua  valeamus  eius  mandata  exsequi,  nobis  impertitur.  Atque  haec  quidem  omnia  nobis  largitur  propter  Iesum  Christum  Dominum  nostrum,  qui  unus  cum  patre  Deus  cum  esset  (Ioan.  1),  carnem  nostram  induit,  quo  nobiscum  foedus  iniret,  ac  Deo  nos  proxime  adiungeret,  quos  peccata  longo  intervallo  ab  eo  distraxerant  (Ies.  53).  Hic  mortis  etiam  suae  merito,  iustitiae  Dei  debita  nostra  persolvit,  iramque  eius  placavit  a  maledictione  ac  iudicio, [p. 49]  cui  obnoxii  eramus,  nos  redimens,  ac  peccati  poenam  in  corpore  suo  perferens,  ut  ab  ea  nos  solveret  (Eph.  2.  Col.  1).  Hic  omnem  coelestium  benedictionum  opulentiam  in  terras  descendens  secum  attulit,  quas  in  nos  larga  manu  effunderet  (Ioan.  1.  7.  Rom.  8).  Sunt  autem  dona  spiritus  sancti:  per  quem  regeneramur,  e  diaboli  potestate  et  vinculis  explicamur  in  filios  Dei  gratuito  adoptamur,  ad  omne  opus  bonum  sanctificamur;  per  quem  etiam,  quamdiu  in  hoc  mortali  corpore  tenemur,  emoriuntur  in  nobis  pravae  cupiditates,  carnis  desideria  et  quidquid  naturae  nostrae  contorta  corruptaque  perversitas  gignit;  per  quem  de  die  in  diem  renovamur,  ut  in  novitate  vitae  ambulemus  ac  iustitiae  vivamus.  Haec  omnia  nobis  a  Deo  offeruntur  ac  dantur  in  Christo  Domino  nostro,  nempe  remissio  peccatorum  gratuita,  pax  et  reconciliatio  cum  Deo,  dona  et  gratiae  spiritus  sancti,  si  certa  fide  ea  amplectimur  et  accipimus,  magna  fiducia  divinae  bonitati  innixi,