38:3  3  PRAELECTIONES  turpius  est,  quod  scilicet  addixerint  se  soli  et  lunae  et  stellis  in  servitutem.  Tertio  loco  ponit,  quod  ambulaverint  post  ipsos.  Atqui  Deus  viam  illis  monstraverat  et  praeceperat  ut  ipsum  sequerentur:  atqui  relicto  Deo  dicit  propheta  sequutos  fuisse  stellas  coeli.  Quarto  loco  ponit,  quod  quaesierint:  quo  verbo  significat  pertinaciam.  Quod  enim  alii  accipiunt  pro  consulere,  mihi  non  placet,  quia  est  coactum  et  longe  petitum.  Ego  itaque  non  dubito  quin  propheta  hic  denotet  continuum  perseverandi  studium  in  Iudaeis,  quod  non  subito  tantum  impetu  sequuti  fuerint  sua  idola,  sed  obstinate  se  illis  addixerint,  et  fuerint  quasi  affixa  tam  perversae  cupiditati.  Postea  extremo  loco  ponit,  quod  se  prostraverint  coram  ipsis.  Hoc  refertur  ad  servitutem.  Idem  enim  est  dare  hoc  signum  reverentiae,  ubi  homines  se  prosternunt  coram  idolis,  atque  si  servirent.  Nam  hoc  totum  sub  cultu  comprehenditur.  Caeterum  quum  propheta  uno  verbo  satis  exprimere  posset  impietatem  populi  sui,  plura  verba  simul  coniunxit  amplificandi  causa,  ut  scilicet  palam  fieret  turpis  illa  populi  ingratitudo,  quod  maluisset  sibi  adsciscere  deos  sibi  incognitos,  et  erigere  perversos  et  fictitios  cultus,  quam  praestare  Deo  vero  obsequium  et  acquiescere  in  eius  lege,  quae  erat  certa  regula,  et  quae  fallere  non  posset.  Postea  adiungit,  Non  colligentur,  et  non  sepelientur:  in  stercus  erunt  super  faciem  terrae,  hoc  est,  in  superficie  terrae.  Confirmat  poenam  illam,  de  qua  nuper  concionatus  est,  nempe  quemadmodum  contumeliosi  fuerant  adversus  Deum,  et  sese  prostituerant  coram  idolis,  ita  post  mortem  fore  ignominiosos  et  detestabiles,  ut  scilicet  mens  a  tali  spectaculo  et  tam  foedo  abhorreat.  Haec  summa  est.  Sequitur,  3.  Et  eligetur  (ad  verbum  esset,  electa  est)  mors  (sed  debet  resolvi  in  futurum  tempus)  prae  vita  ab  omnibus  reliquiis,  quae  residuae  erunt  ab  hac  prava  natione  (a  natione  hac  mala),  in  omnibus  locis  ubi  residui  fuerint,  ad  quae  expulero  eos  (ad  quae  illuc.  Sed  Dl^  est  supervacuum),  dicit  Iehovah  exercituum.  Hoc  versu  significat,  quicunque  erunt  superstites  fore  bis  miseros,  ut  satius  illis  fuerit,  semel  mori,  quam  tabescere  in  diuturnis  malis.  Neque  enim  videntur  mihi  assequi  prophetae  sensum,  qui  alio  torquent  verba.  Summa  est  igitur,  quamvis  formidabile  sit  iudicium  illud  Dei,  quod  scilicet  edentur  ubique  strages,  deinde  extrahentur  cadavera  quae  pridem  sepulta  fuerant,  tamen  hoc  fore  leve  prae  ea  poena,  quam  Dominus  infliget  reliquis,  quos  tamen  servabit  superstites.  Denique  significat  vitam  miseriorem  fore  morte  ipsa,  vel  etiam  decem  mortibus.  Ergo  ne  existiment  se  quidquam  fecisse  lucri  qui  mortem  effugient,  dicit  propheta,  Optabitur^  i