41:299  299  PRAELECTIONES  300  9.  Et  dixit,  Vade  Daniel,  quia  clausi  sunt,  et  obsignati  sermones  ad  tempus  finis  (hoc  est,  ad  tempus  praefixum,  ut  prius  exposuimus).  Quamvis  Daniel  non  stulta  curiositate  inductus  quaesierit  ex  angelo  de  fine  mirabilium,  tamen  non  obtinet  quod  petebat,  quia  scilicet  voluit  Deus  ad  modum  aliquem  intelligi  quae  praedixerat,  sed  tamen  aliquid  manere  occultum  usque  dum  veniret  maturum  plenae  revelationis  tempus.  Haec  igitur  ratio  est  cur  angelus  non  exaudiat  Danielem.  Pium  quidem  erat  eius  votum  (neque  enim,  ut  dictum  fuit,  optat  quidquam  scire  plus  quam  fas  esset)  verum  Deus  scit  quid  opus  sit,  ideo  non  concessit  illi  quod  optabat.  Dimittitur  ergo  ab  angelo,  quoniam  clausa  sunt  et  obsignata  verba.  Hic  alio  sensu  dicit  angelus  verba  clausa  esse,  quam  prius.  Nam  iubebat  Danielem  claudere  et  obsignare  sermones  instar  pretiosi  thesauri,  quamvis  apud  multos  incredulos  et  totum  fere  populum  vilescerent.  Hic  autem  dicit  sermones  esse  clausos  et  obsignatos,  quia  nondum  opportuna  sit  revelatio,  quasi  diceret  nihil  frustra  vel  temere  fuisse  quidem  praedictum,  sed  tamen  plenam  lucem  nondum  maturam  esse  :  ergo  exspectandum  donec  ipsa  veritas  vel  effectus  ipse  rerum  comprobet  divinitus  angelum  fuisse  loquutum.  Haec  est  summa.  Et  ideo  dicit,  Ad  tempus  finis.  Poterat  enim  quispiam  excipere,  quorsum  igitur  oportuit  haec  praedici.  Nam  Daniel  ipse  qui  edoctus  fuit  ab  angelo,  non  tamen  potuit  penitus  assequi  quod  dictum  erat:  deinde  alii  etiam  fideles  versati  sunt  in  hoc  vaticinio  quaBI  in  labyrintho  aliqua  ex  parte.  Responsio  hic  additur,  usque  ad  tempus  finitum:  et  tamen  simul  memoria  tenendum  est  neque  Danielem,  neque  alios  pios  lusisse  operam  in  hoc  vaticinio.  Deus  enim  patefecit  illis  quantum  satis  erat  pro  temporis  ratione.  Sequitur.  Nam  levius  multa  praetereo,  ut  hodie  finiam.  10.  Mundabuntur,  et  dealbabuntur,  et  fundentur  multi  (vel  excoquentur  :  verbum  hoc  Tsaraph  significat  fundere:  sed  accipitur  hic  translatitie  pro  purgare),  et  impie  se  gerent  impii:  et  non  intelligent  omnes  impii,  et  prudentes  intelligent.  Iterum  commemorat  angelus  persequutiones  quae  instabant,  ut  scilicet  fideles  armaret  ad  obeunda  certamina.  Scimus  alioqui  quam  teneri  sint  nobis  ac  molles  animi.  Nam  simul  ac  nobis  obiicitur  aliquis  metus,  antequam  ad  manus  ventum  fuerit,  quasi  exanimes  concidimus.  Quum  ergo  tanta  sit  in  nobis  animi  pusillanimitas,  ideo  necesse  est  multis  modis  instrui  ad  patientiam,  quo  scilicet  strenue  pugnemus,  neque  succumbamus  ullis  tentationibus.  Haec  ratio  est  cur  iterum  pronuntiet  angelus  opus  esse  piis  multiplici  purgatione,  ut  mun-