8:298  ligit,  universali  reatu  sic  obstrictos  teneri  reprobos,  ut  in  morte  relicti,  iustum  iudicium  sustineant.  Idem  et  nos  tradimus,  quia  in  Adam  sumus  ad  unum  omnes  perditi,  iusto  Dei  iudicio  perire,  qui  pereunt:  et  simul  tamen  fatemur,  quidquid  Adae  accidit,  divinitus  fuisse  ordinatum.  Nunc  mihi  non  tam  quid  vel  quo  ordine  dicat  Pighius  considerandum  est,  quam  ut  cum  sua  desperata  impudentia  iaceat  confusus  nebulo:  et  piis  conscientiis  satisfiat,  quas  per  imperitiam  turbari  non  raro  cernimus.  Itaque  quidquid  speciosum  est  in  fluxa  et  prope  immensa  eius  loquacitate  excerpam:  ut  omnes  intelligant,  multa  dicendo  nihil  eum  dicere.*)  Cum  speciali  electione  congruere  non  videtur,  quod  Christus  totius  mundi  redemptor  omnibus  promiscue  evangelium  praedicari  iussit.  Atqui,  [pag.  86]  evangelium  legatio  est  pacis,  qua  reconciliatur  mundus  Deo,  ut  Paulus  docet  (2  Cor.  5,  18):  et  eodem  teste  annunciatur,  ut  qui  audiunt,  salvi  fiant.  Respondeo  breviter,  Christum  sic  toti  mundo  ordinatum  esse  in  salutem,  ut  eos  servet  qui  a  patre  illi  dati  sunt:  eorum  sit  vita,  quorum  est  caput:  eos  in  bonorum  suorum  societatem  recipiat,  quos  sibi  Deus  gratuito  beneplacito  haeredes  adoptavit.  Quid  horum  negari  potest?  Illud  Iesaiae  vaticinium  apostolus  in  eo  impletum  pronunciat:  Ecce  ego  et  pueri  mei,  quos  Dominus  mihi  dedit  (Iesai.  8,  18;  Hebr.  2,  13).  Clamat  ipse  Christus:  Omne  quod  mihi  dedit  pater,  custodiam,  ne  quid  pereat  (Ioann.  6,  37).  Quod  vitam  non  nisi  in  membra  sua  diffundat,  passim  legimus.  Inseri  porro  in  eius  corpus,  speciale  donum  qui  non  fatetur,  epistolam  ad  Ephesios  nunquam  attente  legit.  Unde  et  tertium  illud  sequitur:  Christi  virtutem  non  nisi  ad  Dei  filios  pertinere.  Quanquam  non  melius  quam  ex  evangelii  praedicatione  aestimandam  esse  universalem  Christi  gratiam,  ipsa  quoque  pars  adversa  mihi  concedet.  Quare  in  eo  sita  est  nodi  solutio,  si  tenemus  quomodo  salutem  omnibus  offerat  evangelii  doctrina.  Equidem  omnibus  sua  natura  salvificam  esse  non  nego.  Tantum  hoc  quaeritur:  an  Dominus  aeterno  suo  consilio  communem  illic  omnibus  salutem  destinaverit.  Vocari  omnes  indifferenter  ad  poenitentiam  et  fidem:  proponi  [pag.  87]  omnibus  eundem  mediatorem,  qui  patri  ipsos  reconciliet,  satis  notum  est:  sed  aeque  notum  est,  nihil  nisi  fide  percipi:  ut  illud  Pauli  impleatur:  Evangelium  esse  Dei  potentiam  in  salutem  omni  credenti  (Rom.  1,  16).  Aliis  autem  quid  restat,  nisi  ut  odor  sit  mortis  in  mortem?  ut  idem  alibi  loquitur  (2  Cor.  2,  16).  Porro,  quum  palam  appareat,  ex  multis  quos  externa  voce  Deus  compellat,  vix  paucos  credere:  1)  Ie  recueilleray  donques  en  somme  les  argumens  que  font  tels  supports  de  Satan,  et  monstreray  que  le  tout  n'est  que  fumee.