52:298  pietatem.  8.  Nam  corporalis  exercitatio  paululum  habet  utilitatis  :  at  pietas  ad  omnia  utilis  est,  ut  quae  promissiones  habeat  vitae  praesentis  ac  futurae.  9.  Fidelis  sermo,  dignusque  qui  modis  omnibus  approbetur.  10.  Nam  in  hoc  et  laboramus,  et  probris  afficimur,  quod  spem  fixam  habemus  in  Deo  vivente,  qui  servator  est  omnium  hominum,  maxime  fidelium.  6.  Haec  suggerens.  Hoc  verbo  ad  frequentem  earum  rerum  commonefactionem  hortatur.  Quod  iterum  paulo  post,  et  tertio  repetet.  Sunt  enim  res  eiusmodi  quas  saepius  in  memoriam  revocari  expediat.  Ac  notanda  est  antithesis  quae  subest.  Non  enim  doctrinam,  quam  commendat,  falsis  opponit  aut  impiis  dogmatibus,  sed  nihili  argutiis  quae  non  aedificant.  Eas  vult  longa  oblivione  sepultas  esse,  quum  Timotheum  aliis  suggerendis  intentum  esse  iubet.  Bonus  eris  minister.  Quidvis  potius  saepenumero  affectant  homines,  quam  se  Christo  probare.  Hinc  sit  ut  ingenii,  facundiae,  reconditae  scientiae  laudem  plures  aucupentur.  Atque  eadem  ratio  est  cur  posthabeantur  res  necessariae,  quae  ad  conciliandam  vulgi  admirationem  minus  valent.  At  Paulus  hoc  uno  contentum  esse  Timotheum  iubet,  ut  fidelis  sit  Christi  minister.  Et  profecto  titulus  hic  longe  honorificentior  nobis  esse  debet,  quam  si  millies  seraphici  subtilesque  vocaremur.  Meminerimus  ergo,  sicuti  summus  est  honos  pii  pastoris,  censeri  bonum  Christi  servum:  ita  nihil  aliud  in  tota  sua  administratione  captandum  illi  esse.  Nam  quisquis  alio  tendet,  fieri  poterit  ut  plausum  reportet  ab  hominibus,  sed  Deo  non  placebit.  Quare,  ne  privemur  tanto  bono,  discamus  nihil  aliud  expetere,  aut  tam  pretiosum  ducere  quin  prae  hoc  uno  vilescant  nobis  omnia.  Innutritus.  Quia  participium  est  medium,  transferri  etiam  active  posset  enutriens  :  sed  quum  nulla  addita  sit  constructio,  videtur  id  mihi  esse  nonnihil  coactum.  Quare  malo  passive  accipere,  ut  confirmet  proximam  exhortationem  ab  educatione  Timothei:  ac  si  diceret,  Quemadmodum  ab  incunabulis  fuisti  recte  institutus  in  fide,  et  quasi  una  cum  lacte  imbibisti  sanam  doctrinam:  et  continuos  in  ea  progressus  hucusque  fecisti:  da  operam  ut  fideliter  ministrando  talem  esse  te  comprobes.  Huc  etiam  convenit  verbi  compositio.  Fides  hic  pro  summa  doctrinae  christianae  capitur.  Et  quod  de  bona  doctrina  mox  addidit,  exegeticum  est.  Nam  significat  aliis  omnibus  doctrinis  nihil  utilitatis  inesse:  quantumvis  sint  plausibiles.  Particula  haec,  quam  sequutus  es,  perseverantiam  significat.  Nam  multi  qui  a  pueritia  Christum  pure  didicerant,  postea  degenerant  temporis  progressu:  quibus  dissimilem  facit  Timotheum.  7.  Exerce  teipsum.  Postquam  de  doctrina  prae-